މައްކާގައި ތިބި ދިވެހި ހައްޖުވެރިންނާއި ރައީސް ޑރ. މުހައްމަދު މުއިއްޒު މިއަދު ބައްދަލުކުރައްވައިފި އެެވެ.
އިސްލާމިކް މިނިސްޓްރީން ބުނީ އެ ބައްދަލުކުރެއްވުން ބާއްވާފައި ވަނީ ދިވެހި ހައްޖުވެރިން މައްކާގައި ތިބޭ ހޮޓަލުގައި ކަމަށެވެ.
އެ ބައްދަލުކުރެއްވުމުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އާއި އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުހައްމަދު ލަތީފްގެ އިތުރުން ރައީސްގެ އަރިހުގައި ސައުދީއަށް ވަޑައިގެންނެވި އިތުރު މިނިސްޓަރު ވެސް ބައިވެރިވެވަޑައިގަތެވެ.
މިނިސްޓްރީން ބުނީ އެ ބައްދަލުކުރެއްވުމުގައި ޙައްޖުވެރިންނާއި މުހާތަބު ކުރައްވާ ރައީސް ދެއްކެވި ވާހަކަފުޅުގައި ހައްޖުވެރިންނާ ގުޅޭ ކަންކަން ހަރުދަނާކުރުމަށް ސަރުކާރުން މިހާތަނަށް ކޮށްފައިވާ ކަންކަމަށް އަލިއަޅުއްވާލެއްވި ކަމަށެވެ. މި އަހަރު ހައްޖުވެރިން މައްކާއިން މަދީނާއަށް ކުރާ ދަތުރު ހައި ސްޕީޑް ޓްރެއިންގައި ދަތުރުކުރާ ގޮތަށް ހަމަޖައްސަވާފައިވާ ކަމަށް ވެސް ރައީސް ވިދާޅުވި އެވެ.
ރައީސް ވިދާޅުވީ ދިވެހި ސަރުކާރުން އެންމެ އިސްކަމެއްދޭނީ ދިވެހި ހައްޖާޖީންނަށް ވީހާ ވެސް ފުރިހަމަ އިންތިޒާމެއް ހަމަޖައްސައިދިނުމަށް ކަމަށާއި އެންމެ ފުރަތަމަ މަރުހަލާއިން ފެށިގެން ހައްޖާޖީން އެނބުރި ރާއްޖެ އަންނަންދެން ހުރިހާ ކަމެއްގައި ވެސް ވީހާ ވެސް ފުރިހަމައަށް އިންތިޒާމުކޮށްދިނުމަށް ސަރުކާރުން މަސައްކަތް ކުރަމުން އަންނަ ކަމަށެވެ.
ރައީސް ޑރ. މުއިއްޒު މައްކާގައި ތިބި ދިވެހި ހައްޖުވެރިންނާއި ބައްދަލުކުރެއްވުން / ފޮޓޯ: އިސްލާމިކް މިނިސްޓްރީ
މި އަހަރުގެ ހައްޖަކީ ދިވެހިންނަށް ތާރީހީ ހައްޖަކަށް ވާނެ ކަމަށާއި އެގޮތުން ސައުދީ ސަރުކާރާއި އެ ގައުމުގެ ވަލީއަހުދުގެ ހާއްސަ ނިންމެވުމުގެ ދަށުން "މައްކާ ރޫޓު އިނީޝިއޭޓިވް"ގެ ތެރެއިން ދިވެހި ހައްޖާޖީންނަށް މިފަހަރު ފަހި ފުރުސަތުތަކެއް ލިބި ހައްޖުގެ އަޅުކަން އަދާކުރުމަށް ސައުދީއަށް ދިއުމުގައި ވަރަށް ބޮޑު ލުޔެއް ލިބިފައިވާ ކަމަށް ރައީސް ވިދާޅުވި އެވެ.
ރައީސް ވަނީ އެކަމަށްޓަކައި ސައުދީ ރަސްގެފާނަށާއި ވަލީއަހުދު މުހައްމަދު ބިން ސަލްމާނަށް ޝުކުރު އަދާކުރައްވައިފަ އެވެ.
މި އަހަރު ރާއްޖެއިން ހައްޖަށް ދާ 1،000 ހައްޖުވެރިން މިހާރު ވަނީ މައްކާއަށް ގޮސްފަ އެވެ.
