މި އަހަރުގެ މެއި މަހުން ފެށިގެން ކަރަންޓު ބިލުކުރެވިގެން ދާނީ ކުޑަ ޓެރިފް ރޭޓުގައިކަމަށް ފެނަކަ ކޯޕަރޭޝަނުން މިއަދު ހާމަކޮށްފިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކާއި ގުޅިގެން އަންނަ ބަދަލެކެވެ.

ގޭބިސީތަކުގެ ކަރަންޓު ބިލުގެ ޓެރިފް ރޭޓު ކުޑަކުރުމަށް ރައީސް އޮފީހުން އިޢުލާންކުރީ މެއި މަހުގެ 30 ވަނަ ދުވަހު އެވެ. މި ނިންމުމާއި ގުޅިގެން، ކަރަންޓު ބޭނުންކުރާ މިންވަރަށް ބަލައި ކަނޑައަޅާފައިވާ ހުރިހާ ބޭންޑްތަކެއްގެ އަގު ވަނީ ދަށްކޮށްފައެވެ.

ފެނަކައިން ބުނި ގޮތުގައި، މި ބަދަލާއި ގުޅިގެން މެއި މަހުގެ ކަރަންޓު ބިލު އަދި ދައްކާފައި ނުވާ ފަރާތްތަކަށް ކުޑަ ޓެރިފް ރޭޓުގައި ބިލު އަލުން ޖެނެރޭޓްކުރެވޭނެއެވެ. އަދި މެއި މަހުގެ ބިލަށް މިހާރު ފައިސާ ދައްކާފައިވާ ފަރާތްތަކަށް، ޖޫން މަހުގެ ބިލުން އެ ބައި އުނިކުރެވިގެންދާނެ ކަމަށްވެސް ފެނަކައިން ވަނީ ހާމަކޮށްފައެވެ.

މި ބަދަލާއި ގުޅިގެން، 0-100 ޔުނިޓުގެ ބޭންޑުގެ އަގު 1.50 ރުފިޔާއިން 1.25 ރުފިޔާއަށް ދަށްވެފައިވާއިރު، 301-400 ޔުނިޓުގެ ބޭންޑުގެ އަގު 2.50 ރުފިޔާއިން 1.50 ރުފިޔާއަށް ދަށްވެފައިވެއެވެ. 600 ޔުނިޓުން މަތީގެ ބޭންޑްތަކުގެ އަގު 4.25 ރުފިޔާއިން 3.83 ރުފިޔާއަށް ދަށްވެފައިވެއެވެ.