ލ. އަތޮޅު ފޮނަދޫގައި ބޭއްވުނު އޭއެފްސީ "ސީ" ލައިސެންސް ކޯޗިން ކޯސް ކާމިޔާބުކަމާއެކު ނިންމާލައިފިއެވެ. މޯލްޑިވްސް ނޭޝަނަލް އިންސްޓިޓިއުޓް އޮފް ސްޕޯޓްސްއިން ކުރިޔަށް ގެންދިޔަ މި ކޯހުގައި 16 ބައިވެރިން ބައިވެރިވިއެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަދި ލ. އަތޮޅު ކައުންސިލާއި ގުޅިގެން ކުރިޔަށް ގެންދިޔަ މި ކޯހުގައި ކިޔަވައިދިނީ ރާއްޖޭގެ ފުޓްބޯޅައިގެ ތަޖުރިބާކާރު ދެ ކޯޗުންނެވެ. އެއީ މުހައްމަދު ޝާޒްލީ އާއި އަލީ ނިސްތާރު މުހައްމަދެވެ.
ކުޅިވަރާއި ހަށިހެޔޮކަމާ ބެހޭ ވުޒާރާއިން މަޢުލޫމާތު ދެއްވި ގޮތުގައި، ނޭޝަނަލް ސްޕޯޓްސް އިންސްޓިޓިއުޓުން ކުރިޔަށް ގެންދިޔަ މި ކޯހަކީ އަންނަން އޮތް ޖީލުގެ ފުޓްބޯޅަ ކޯޗުން ކުރިއަރުވާ ބާރުވެރިކުރުމަށް އެޅޭ މުހިންމު ފިޔަވަޅެކެވެ.
