ރާއްޖޭގެ މިނިވަން ދުވަހާ ދިމާކޮށް، މި އަހަރުގެ ޖުލައި މަހު އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެ ޒިޔާރަތްކުރެއްވުން އެކަށީގެންވާ ކަމަށް އިންޑިއާގެ މީޑިއާތަކުން ރިޕޯޓުކޮށްފިއެވެ. މިއީ ރައީސް ޑރ. މުޙައްމަދު މުޢިއްޒު ވެރިކަމާއި ޙަވާލުވެވަޑައިގަތް ފަހުން، މޯދީ ރާއްޖެއަށް ކުރައްވާ ފުރަތަމަ ދަތުރުފުޅު ކަމަށްވާނެއެވެ.
މި ދަތުރުފުޅަށް ދަޢުވަތު އެރުވީ ރައީސް ޑރ. މުޢިއްޒު ކަމަށާއި، މިފަހުން އިންޑިއާއަށް ކުރެއްވި ދަތުރުފުޅުގައި ރާއްޖޭގެ ޚާރިޖީ ވަޒީރު ޢަބްދުﷲ ޚަލީލް މި ދަޢުވަތު އަލުން އާކުރެއްވި ކަމަށް ވެއެވެ.
މި ދަތުރުފުޅަކީ މީގެ ކުރިން ދެ ޤައުމުގެ ގުޅުމަށް އައި ހީނަރުކަމަށްފަހު، ދުވަހަކަށްވުރެދުވަހަކު ގުޅުން ވަރަށް ރަނގަޅުވަމުން އަންނަކަމުގެ ނިޝާނެކެވެ. އޭރު ދިވެހިރާއްޖޭގެ ފަތުރުވެރިކަން ބޮއިކޮޓްކުރުމަށް އިންޑިއާގައި ގޮވާލާފައިވެއެވެ.
މި ދަތުރުފުޅު ކަށަވަރުވެއްޖެނަމަ، އެއީ އިންޑިއާއާއި ރާއްޖެއާ ދެމެދު ޑިޕްލޮމެޓިކް ގުޅުން ޤާއިމުކުރިތާ 60 އަހަރު ފުރޭ ދުވަހާ ދިމާވާނެއެވެ. އަދި މިއީ ތަރައްޤީއާއި، ސަލާމަތީ ކަންކަމާއި، ވިޔަފާރީގެ ދާއިރާތަކުން ދެ ޤައުމުގެ އެއްބާރުލުން އިތުރުކުރުމަށް ކުރެވޭ މަސައްކަތްތައް ފާހަގަކޮށްދޭ ކަމެއް ކަމުގައިވެސް ބެލެވެއެވެ.
ފާހަގަ ކޮށްލަންޖެހޭ މުހިންމު ކަމަކީ މިދިޔަ އަހަރުގެ އޮކްޓޯބަރު މަހު، ރައީސް ޑރ. މުޙައްމަދު މުޢިއްޒު އިންޑިއާއަށް ފުރަތަމަ ރަސްމީ ދަތުރުފުޅެއް ކުރެއްވިއެވެ. މި ދަތުރުފުޅުގެ މައިގަނޑު މަޤްޞަދަކީ ދެ ޤައުމުގެ ދެމެދުގައި ހީނަރުވެފައިވާ ގުޅުން އަލުން ރަނގަޅުކުރުމެވެ.
ރަޝްޓްރަޕަތި ބަވަންގައި އިންޑިއާގެ ބޮޑުވަޒީރު ނަރެންދްރަ މޯދީ އާއި ރައީސް ދްރައުޕަދީ މުރުމު ވަނީ އެމަނިކުފާނަށް ރަތް ދޫލައިގެ މަރުޙަބާ ވިދާޅުވެ ޚާއްޞަ ޖާފަތެއް ވެސް ބާއްވާފައެވެ. މި ދަތުރުފުޅުގައި ދެ ޤައުމުގެ ހަކަތައިގެ ދާއިރާއާއި، ވިޔަފާރިއާއި، ދިފާޢީ ދާއިރާއިން އެއްބާރުލުން އިތުރުކުރުމާ ބެހޭގޮތުން މަޝްވަރާކުރެއްވިއެވެ.
ރާއްޖެއަށް ދިމާވެފައިވާ އިޤްތިޞާދީ ގޮންޖެހުންތަކުގައި އެހީތެރިވުމުގެ ގޮތުން، އިންޑިއާއިން ރާއްޖެއަށް ބޮޑެތި މާލީ އެހީތައް ދިނުމަށް ވެސް އެ ދަތުރުފުޅުގައި އެއްބަސްވިއެވެ. މީގެ ތެރޭގައި 400 މިލިއަން ޑޮލަރުގެ ކަރަންސީ ސްވޮޕް އެއްބަސްވުމަކާއި، ފައިސާގެ އެހީގެ އެއްބަސްވުން ހިމެނެއެވެ.
މި ދަތުރުފުޅަކީ އިންޑިއާ-ރާއްޖެ ގުޅުމުގެ "އައު ބާބެއް" ކަމަށް ބޮޑުވަޒީރު މޯދީ ސިފަކުރެއްވިއެވެ.
