ރާއްޖެ އާއި އޮސްޓްރޭލިއާ އާއި ދެމެދުގައި ދިފާއީ އަދި ޓޫރިޒަމްގެ ދާއިރާއިން ގުޅުން ބަދަހިކުރުމަށް ދެ ގައުމުގެ ދެމެދުގައި މިއަދު މަޝްވަރާކޮށްފި އެވެ.
ރައީސް އޮފީހުން ބުނީ އޮސްޓްރޭލިއާގެ ބޮޑުވަޒީރުގެ ނައިބު އަދި ދިފާއީ ވަޒީރު ރިޗަޑް މާލްސް އެމްޕީ, ނައިބު ރައީސް ހުސައިން މުހައްމަދު ލަތީފުއާ އެ އޮފީހުގައި މިއަދު ހެނދުނު ބައްދަލުކުރައްވާފައިވާ ކަމަށެވެ.
އެ ބައްދަލުކުރެއްވުމުގައި ދެ ބޭފުޅުން ވަނީ، ދެ ގައުމުގެ މެދުގައި ދިފާއީ އަދި ޓޫރިޒަމްގެ ދާއިރާއިން ގުޅުން ބަދަހިކުރުމާ ބެހޭ ގޮތުން މަޝްވަރާކުރައްވައިފަ އެވެ.
ރައީސް އޮފީހުން ބުނީ ދެ ގައުމުގެ ތިމާވެށީގެ ނާޒުކު ކަމާއި ތިމާވެށި ހިމާޔަތްކުރުމަށް ކުރަމުން އަންނަ މަސައްކަތްތަކަށް ވެސް ދެ ބޭފުޅުންގެ ވާހަކަފުޅުގައި އަލިއަޅުއްވާލެއްވި ކަމަށެވެ. އަދި ބޮޑުވަޒީރުގެ ނައިބުގެ ވާހަކަފުޅުގައި މޫސުމީ ބަދަލުތަކާއި އޭގެ ގޮންޖެހުންތަކާ ދެކޮޅަށް ރާއްޖެއިން ކުރަމުން އަންނަ މަސައްކަތްތައް ވެސް ފާހަގަކުރެއްވި ކަމަށް ރައީސް އޮފީހުން ބުންޏެވެ.
މިއަދުގެ ބައްދަލުވުން ނިންމާލެއްވީ ސިޔާސީ ގުޅުންތައް ހަރުދަނާކުރުމާއި ދެ ފަރާތުގެ މަސްލަހަތު ހުރި ކަންކަމުގައި އިސްތިރާޖީ އެއްބާރުލުން އިތުރުކޮށް، ދޭދޭ ގުޅުންތައް އިތުރަށް ބަދަހިކުރެއްވުމަށް މަސައްކަތްކުރައްވާނެ ކަމުގެ ޔަގީންކަން ދެއްވަމުން ކަމަށް ރައީސް އޮފީހުން ބުންޏެވެ
