ރާއްޖޭން ނޭޕާލާއި އަޔަލެންޑް އަދި ޔޫކްރޭނަށް ނޮން-ރެޒިޑެންޓް ސަފީރުން އައްޔަންކުރެއްވުމަށް ރައީސް ޑރ. މުހައްމަދު މުއިއްޒު ފޮނުއްވާފައިވާ ހުށަހެޅުން ދިރާސާކުރުމަށް މަޖިލީހުގެ ހާރިޖީ ގުޅުންތަކާއި ބެހޭ ކޮމިޓީއަށް މިއަދު ފޮނުވައިފި އެވެ.

އެކި ގައުމުތަކަށް ސަފީރުންނާއި ނޮން-ރެޒިޑެންޓް ސަފީރުން އައްޔަންކުރައްވާނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ އެވެ.

ނޮން-ރެޒިޑެންޓް ސަފީރުން އައްޔަންކުރައްވަނީ ސަފީރުންގެ ގޮތުގައި މިހާރު ވެސް ތިއްބަވާ ބޭފުޅުންނެވެ.

ރައީސް މަޖިލީހަށް ފޮނުއްވާފައި ނަންތަކަކީ އިންޑިއާއަށް ކަނޑައަޅާފައި ހުންނަ ސަފީރު އައިޝަތު އަޒީމާ, ނޭޕާލުގައި ހުންނަ ނޮން-ރެޒިޑަންޓް ސަފީރުކަމަށް އައްޔަން ކުރެއްވުމަށެވެ. އަދި އިނގިރޭސިވިލާތަށް ކަނޑައަޅާފައި ހުންނަ ސަފީރު އިރުތިޝާމް އާދަމް، އަޔަލޭންޑްގައި ހުންނަ ނޮން-ރެޒިޑަންޓް ސަފީރު ކަމަށް އައްޔަންކުރެއްވުމަށް ވެސް ރައީސް ހުށަހަޅުއްވާފައިވެ އެވެ.

ބެލްޖިއަމަށާއި ޔޫރަޕިއަން ޔޫނިއަންއަށް ކަނޑައަޅާފައި ހުންނަ ސަފީރު ގީލާ އަލީ، ޔޫކްރެއިންގައި ހުންނަ ނޮން-ރެޒިޑަންޓް ސަފީރު ކަމަށް އައްޔަންކުރެއްވުމަށް ވެސް ރައީސް ވަނީ އޭނާގެ ނަން ފޮނުއްވައިފަ އެވެ.

ނޮން-ރެޒިޑެންޓް ސަފީރުން ރައީސް އައްޔަންކުރައްވާނީ ހާރިޖީ ގުޅުންތަކާ ބެހޭ ކޮމިޓީން އެ ނަންތައް ދިރާސާކުރުމަށް ފަހު މަޖިލީހުގެ ތަޅުމަށް ފޮނުވައި ނަން ފާސްކުރުމުންނެވެ.