ކަނޑުތަކުން އުފައްދާ އޮކްސިޖަން މަދުވަމުންދާ ކަމަށް ތިމާވެށީގެ މާހިރުން ބުނެފިއެވެ.
ދުނިޔޭގެ ތިމާވެށީގެ ދުވަހާ ގުޅިގެން، މިއަދު ނެރުނު ރިޕޯޓެއްގައި ބުނެފައިވާ ގޮތުގައި އިންސާނުން ނޭވާލާ އޮކްސިޖަންގެ 50 އިންސައްތައަށްވުރެ ގިނަ އުފައްދަނީ ކަނޑުތަކުންނެވެ. ނަމަވެސް، ޕްލާސްޓިކުގެ ސަބަބުން ކަނޑުތަކަށް ނޭވާ ނުލެވޭ ހިސާބަށް ދާކަމަށް މާހިރުން ވަނީ ބުނެފައެވެ.
ރިޕޯޓުގައި ހާމަކޮށްފައިވާ ގޮތުގައި، ކޮންމެ އަހަރަކު 8 މިލިއަން ޓަނަށްވުރެ ގިނަ ޕްލާސްޓިކް ކަނޑުތަކަށް އެޅެއެވެ. މިކަމުގެ ސަބަބުން ކަނޑުގެ ދިރުންތަކަށާއި މުޅި ކަނޑުގެ ނިޒާމަށް ނޭދެވޭ އަސަރުތަކެއް ކުރަމުންދާ ކަމަށް ރިޕޯޓުގައި ބުނެފައިވެއެވެ.
Advertisement
ކަނޑުތައް ސާފުކޮށް ބެލެހެއްޓުމަކީ ދިވެހިރާއްޖެ ފަދަ ޖަޒީރާ ޤައުމުތަކުގެ ޒިންމާއެއްކަމަށް ދެކިގެން އެކަން ކުރުން ވަރަށް މުހިންމު ކަމަށް ފަތުރުވެރިކަމާއި ތިމާވެއްޓާބެހޭ ވުޒާރާއިން ވަނީ ބުނެފައެވެ.
އެ ވުޒާރާއިން ބުނީ ދުނިޔޭގެ ތިމާވެށީގެ ދުވަހާ ގުޅިގެން ރާއްޖޭގެ އެކި ހިސާބުތަކުގައި ހޭލުންތެރިކަން އިތުރުކުރުމުގެ ހަރަކާތްތަކެއް ކުރިއަށްދާނެ ކަމަށެވެ. މީގެ ތެރޭގައި ރަށްރަށުގައި ގޮނޑުދޮށް ސާފުކުރުމުގެ ޕްރޮގްރާމްތަކާއި، ސްކޫލްތަކުގައި ހިންގޭ ހާއްސަ ސެޝަންތައް ހިމެނޭކަމަށް ވުޒާރާއިން ބުންޏެވެ.
