މިއަދު ކުއްލިޔަކަށް މާލޭގެ ކަރަންޓް ވިއުގަ އަށް މައްސަލައެއް ދިމާވެ މުޅި މާލެ، ހުޅުމާލެ އަދި ހުޅުލެ ހިމެނޭހެން ކަރަންޓު ގޮސްފައިވާތީވެ، އެ މައްސަލަ ސީރިއަސް މައްސަލައެއްގެ ގޮތުގައި ބެލުމަށް ކަމާބެހޭ ފަރާތްތަކުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދަންނަވައިއެވެ.
އެމަނިކުފާނު މައްކާގައި ޙައްޖުގެ އަޅުކަމަށް ވަޑައިގެން ހުންނެވި ވަގުތެއްގައި މާލެއާއި ހުޅުމާލެއަށް މި މައްސަލަ ދިމާވުމުން ދެންމެ ކުރެއްވި އެކްސް ޕޯސްޓެއްގައި ވިދާޅުވީ މިފަދަ ކަމެއް ތަކުރާރު ނުވާނޭހެން ކަރަންޓުގެ ޚިދުމަތުގެ ކަންކަން އިންތިޒާމް ކުރަން ކުރަންޖެހޭ ހުރިހާ ކަމެއް ސަރުކާރުން ކުރާނެ ކަމަށެވެ.
މޯލްޑިވްސް އެއާޕޯތްސް ކޮމްޕެނީގެ އިސް އޮފިޝަލަކު ވިދާޅުވީ މާލެއާއި ހުޅުމާލެއިން ކަރަންޓް ކެނޑުނު މައްސަލައިގައި އެ އެއާޕޯޓުގެ އޮޕަރޭޝަންތަކަށް އެއްވެސް ބުރުލެއް ނާރައެވެ.
“އެއާޕޯޓުގައި ވަގުތުން ބެކަޕް ޖަނަރޭޓަރު ބޭނުންކުރަން ފަށައިފިން. އެއްވެސް މައްސަލައެއް ދިމައެއް ނުވޭ މިތަނުގެ އޮޕަރޭބަނަކަށް” އެއާޕޯޓުގެ އިސް އޮފިޝަލަކު ވިދާޅުވިއެވެ.
ސްޓެލްކޯއިން ބުނީ ގްރޭޓާމާލެ ގުރިޑް އަލުން އެނަރޖައިޒް ކުރުމުގެ ކުރިން ފުރިހަމަ ކުރަންޖެހޭ ޗެކްއަޕްތައް މިހާރު ދަނީ ފުރިހަމަ ކުރެވެމުންނެވެ. މި ޗެކަޕްތައް ނިމުނުހާ އަވަހަކަށް މާލެއާއި، ހުޅުމާލޭގެ ޖަނަރޭޓަރުސެޓްތައް އެނަރޖައިޒް ކުރުމުގެ މަސައްކަތްތައް ކުރިއަށްދާނެ ކަމަށް ވެސް އެފަރާތުން ބުންޏެވެ.
މިއީ މުޅި މާލެއާއި ހުޅުމާލޭގައި އެއްފަހަރާ ކަރަންޓް ކެނޑުނު ފުރަތަމަ ފަހަރެވެ.
ސްޓެލްކޯގެ ކަރަންޓް ވިއުގައަށް ދިމާވި މައްސަލަ އާއި ގުޅިގެން ގިނަ ބަޔަކު ދަނީ ސްޓެލްކޯގެ މެނޭޖްމެންޓަށް ފާޑުކިޔަމުންނެވެ.
