އިންޑިއާގެ އެންމެ ބޮޑު ސިނަމާ ހިންގާ ކުންފުނިތަކުގެ ތެރެއިން އެއް ކުންފުނި ކަމަށްވާ ޕީވީއާރް އިން ދިވެހިރާއްޖޭގައި ސިނަމާއެއް ހުޅުވުމަށް ޝައުގުވެރިކަން ފާޅުކޮށްފިއެވެ.

މި ކުންފުނީގެ ޖޮއިންޓް މެނޭޖިން ޑައިރެކްޓަރު ސަންޖީވް ކުމާރް ބިޖްލީ ވިދާޅުވީ، ދުނިޔޭގެ އެހެން ގައުމެއްގައި ސިނަމާއެއް ހުޅުވަން ފުރުސަތު ލިބިއްޖެނަމަ، އެންމެ ފުރަތަމަ ހިޔާރުކުރާނީ ދިވެހިރާއްޖެ ކަމަށެވެ.

މިދިޔަ ޑިސެމްބަރު މަހު އިންޑިއާގެ ވީލޮގް "ބްރަޓް އިންޑިއާ" އަށް ދެއްވި އިންޓަވިއުއެއްގައި ސަންޖީވް ވިދާޅުވީ، "އަހަރެން ހިޔާރުކުރާނީ ދިވެހިރާއްޖެ. ރާއްޖެއަކު ސިނަމާއެއް ނެތް. އަހަންނަށް ހީވަނީ ރާއްޖެއަށް ދަތުރުކުރާ މީހުންނާއި ޓޫރިސްޓުންނަށް، މޫދު ކުޅިވަރުގެ އިތުރުން ސިނަމާއެއްގައި ފިލްމެއް ބަލައިލުން ވަރަށް ފުރިހަމަ ތަޖުރިބާއަކަށް ވާނެހެން" ކަމަށެވެ.

ޕީވީއާރް އިނޮކްސްއަކީ އިންޑިއާގައި 1،700 އަށް ވުރެ ގިނަ ސިނަމާ ހިންގާ، 25 އަހަރަށް ވުރެ ގިނަ ދުވަހުގެ ތަޖުރިބާ އޮތް ކުންފުންޏެކެވެ. އިންޑިއާގެ އިތުރުން މި ކުންފުނިން ސްރީ ލަންކާގައިވެސް ސިނަމާ ހިންގައެވެ. މި ކުންފުނިން އެކި ވައްތަރުގެ ސިނަމާތައް ހިންގާ އިރު، އޭގެ ތެރޭގައި ސްޓޭންޑާޑް މެއިންސްޓްރީމް ތިއޭޓަރުތަކާއި ޕްރިމިއަމް ފޯމެޓުގެ ތިއޭޓަރުތައް ހިމެނެއެވެ.

މި ވަގުތު ރާއްޖޭގައި ހިންގަމުންދަނީ ދެ ސިނަމާއެވެ. އެއީ ދިވެހި ފިލްމަށް ހާއްސަ އޮލިމްޕަހާއި ބޭރުގެ ފިލްމުތައް އަޅުވާ ޝުވެކް ސިނެމާއެވެ. ނަމަވެސް، ރާއްޖޭގައި ރަނގަޅު ފެންވަރުގެ ސިނަމާއެއް ނެތުމުން ފިލްމަށް ދިއުމަށް ލޯބިކުރާ މީހުންގެ ޝަކުވާ އަބަދުވެސް އޮވެއެވެ.

ޕީވީއާރް ފަދަ ބޮޑު ކުންފުންޏަކުން ރާއްޖޭގައި ސިނަމާއެއް ހުޅުވުމަށް ޝައުގުވެރިކަން ފާޅުކުރުމަކީ، ރާއްޖޭގެ މުނިފޫހިފިލުވުމުގެ ދާއިރާއަށް އައު ކުރިއެރުމެއް ލިބިދާނެ ކަމެއް ކަމަށް ލަފާކުރެވެއެވެ.