ފްރާންސްގެ ޕެރިސް ކައިރީގައި އޮންނަ ކްރެޓޭލްގެ އެޕީލް ކޯޓަކުން، މޮރޮކޯގެ މަޝްހޫރު ލަވަކިޔުންތެރިޔާ ސާދު ލަމްޖަރަދުގެ މައްޗަށް 10 އަހަރުގެ ޖަލު ހުކުމެއް ކޮށްފިއެވެ. މިއީ 2016 ވަނަ އަހަރު ބިރުދައްކައި އަނިޔާކުރުމަށްފަހު ރޭޕްކުރި ކަމުގެ ކުށް ސާބިތުވުމާ ގުޅިގެން ކުރި ހުކުމެކެވެ.
އުމުރުން 41 އަހަރުގެ މި ލަވަކިޔުންތެރިޔާގެ މައްޗަށް ކުށް ސާބިތުވީ، 2016 ވަނަ އަހަރު ޕެރިސްގެ ނައިޓްކްލަބަކުން ބައްދަލުވި 20 އަހަރުގެ ލޯރާ ޕީ. ކިޔާ އަންހެނަކު ޕެރިސްގެ ހޮޓަލެއްގެ ކޮޓަރިއަކަށް ގެންގޮސް ރޭޕްކުރި މައްސަލާގައެވެ. މި މައްސަލާގައި ކޯޓުން ވަނީ އޭނާ ވަގުތުން ހައްޔަރުކޮށް، ފްރާންސްގެ ޖިންސީ ކުށްވެރިންގެ ރެޖިސްޓްރީގައި ހިމެނުމަށްވެސް އަމުރުކޮށްފައެވެ.
މި މައްސަލައިގައި މީގެކުރިން 2023 ވަނަ އަހަރު އޭނާގެ މައްޗަށް 6 އަހަރުގެ ޖަލު ހުކުމެއް އިއްވާފައިވާއިރު، އެންމެ ފަހުން ބޭއްވި އިސްތިއުނާފު އަޑުއެހުންތަކުގައި ޕްރޮސެކިއުޓަރުން އެދިފައިވަނީ 8 އަހަރުގެ ޖަލު ހުކުމަކަށެވެ. ނަމަވެސް ކޯޓުން ވަނީ ހުކުމް ބޮޑުކޮށް 10 އަހަރަށް ބަދަލުކޮށްފައެވެ. ސާދު ލަމްޖަރަދު ފުރަތަމަ ދުވަހުން ފެށިގެންވެސް މި ތުހުމަތުތައް ދޮގުކުރަމުން އައިސްފައިވާއިރު، އޭނާގެ ވަކީލު ބުނެފައިވަނީ މި ހުކުމް ފްރާންސްގެ އެންމެ މަތީ ކޯޓުގައި އިސްތިއުނާފު ކުރާނެ ކަމަށެވެ.
Advertisement
ސެންޓް-ޓްރޮޕޭ ކައިރީގައި 2018 ވަނަ އަހަރު ހިނގި އެފަދަ އެހެން ރޭޕް މައްސަލައަކާ ގުޅިގެން މިއަހަރުގެ މެއި މަހު އިއްވި 5 އަހަރުގެ ޖަލު ހުކުމެއްވެސް އޭނާ ވަނީ އިސްތިއުނާފު ކޮށްފައެވެ.
މޮރޮކޯ އާއި މުޅި އަރަބި ދުނިޔޭގައި އެންމެ މަޝްހޫރު ލަވަކިޔުންތެރިންގެ ތެރޭގައި ހިމެނޭ ސާދު ލަމްޖަރަދަކީ “ލަމެއްލަމް” އާއި، “ގަޒަލި” އަދި އިންޑިއާގެ ބަތަލާ ޖެނިފަރ ވިންގޭޓާއެކު ކުޅުނު “ގުލީ މާތާ” ފަދަ މަޝްހޫރު ލަވަތަކުން ބައިނަލްއަގްވާމީ މަގުބޫލުކަން ހޯދާފައިވާ ފަންނާނެކެވެ. އަދި އޭނާ ވަނީ 2026 ވަނަ އަހަރު ނުކުތް “ބެޒަފް” ލަވައިގައި ޝެހެނާޒް ގިލްއާ އެކުގައިވެސް މަސައްކަތްކޮށްފައެވެ.
