ސުވިޑަންގެ މަޝްހޫރު ލަވަކިޔުންތެރިޔާ ޒާރާ ލާސަން، އެމެރިކާގެ ވައިޓް ހައުސްގެ ރަސްމީ ޓިކްޓޮކް އެކައުންޓުގައި އޭނާގެ މަޝްހޫރު ލަވައެއް ބޭނުންކުރުމާ ގުޅިގެން ހޫނު ރައްދެއް ދީފިއެވެ.

ވައިޓް ހައުސް އިން އާންމުކޮށްފައިވާ މި ވީޑިއޯއަކީ އެމެރިކާގެ އިމްގްރޭޝަން އެންޑް ކަސްޓަމްސް އެންފޯސްމަންޓް (އައިސް) ގެ އޭޖެންޓުން، މީހުން ހައްޔަރުކޮށް ބިޑި އަޅުވައިގެން ޑީޕޯޓުކުރާ މަންޒަރުތައް ދައްކުވައިދޭ ވީޑިއޯއެކެވެ.

މި ވީޑިއޯގައި ޒާރާ ލާސަންގެ 'މިޑްނައިޓް ސަން' ލަވައިގެ ލިރިކސްއާ ގުޅުވައިގެން "ނެވަރ އެންޑިންގ ޑީޕޯޓޭޝަންސް" މިހެން ކެޕްޝަންކޮށްފައިވާއިރު، މިކަމާ ގުޅިގެން ޒާރާ ވަނީ މިއީ އިންސާނިއްޔަތުކަމެއް ނެތް، ވަރަށް ދަށުދަރަޖައިގެ އަމަލެއް ކަމަށް ސިފަކޮށްފައެވެ. އަދި އެ ވީޑިއޯއިން ފެންނަނީ އިންސާނުންކަން ފާހަގަކޮށް، އޭނާގެ ލަވައަކީ މީހުންގެ މެދުގައި ގުޅުން ބަދަހިކުރުމަށް ހެދި ލަވައެއް ކަމަށް އޭނާ ވަނީ ބުނެފައެވެ.

މި ފާޑުކިޔުންތަކާ ގުޅިގެން ވައިޓް ހައުސްގެ ޕޯސްޓުން ޒާރާގެ ލަވަ ވަނީ ފަހުން ނަގާފައެވެ. ނަމަވެސް، ޑީޕޯޓޭޝަންގެ ހަރަކާތްތައް ދައްކުވައިދޭ އެ ވީޑިއޯ އަދިވެސް ޕްލެޓްފޯމުގައި ހުރިކަން ފާހަގަކޮށްލެވެއެވެ.

މިއީ ސިޔާސީ ބޭނުންތަކަށް ޒާރާ ލާސަންގެ މިއުޒިކް، ވައިޓް ހައުސް އިން ނަހަމަގޮތުގައި ބޭނުންކުރި ފުރަތަމަ ފަހަރެއް ނޫނެވެ. މިއަހަރު ކުރީކޮޅު ވެސް، އެމެރިކާގެ ރައީސް ޑޮނަލްޑް ޓްރަމްޕް ފެންނަ ވީޑިއޯއެއްގައި އޭނާގެ 2015 ވަނަ އަހަރުގެ މަޝްހޫރު ލަވަ 'ލަޝް ލައިފް' ބޭނުންކުރުމާ ގުޅިގެން ޒާރާ ވަނީ އޭރު ވެސް ނުރުހުން ފާޅުކޮށްފައެވެ.

ވައިޓް ހައުސްގެ މިފަދަ އަމަލުތަކާ ގުޅިގެން ނުރުހުން ފާޅުކުރި ހަމައެކަނި ފަންނާނަކީ ޒާރާއެއް ނޫނެވެ. އޭނާގެ އިތުރުން ސެބްރީނާ ކަރޕެންޓަރ އާއި އެރިއާނާ ގްރާންޑޭ ފަދަ ބައިނަލްއަގްވާމީ މަޝްހޫރު އެތައް މިއުޒީޝަނެއް ވަނީ، އިމްގްރޭޝަންގެ ހަރުކަށި ސިޔާސަތުތައް ސިފަކޮށްދިނުމަށް އެމީހުންގެ އުފެއްދުންތައް ނަހަމަގޮތުގައި ބޭނުންކުރަމުންދާތީ ބޮޑެތި ކަންބޮޑުވުންތަކެއް ފާޅުކޮށްފައެވެ.