**ޖުލައި މަހުގެ ފުރަތަމަ ދުވަހުން ފެށިގެން ފްރާންސުގައި ކުޑަކުދިން ގޮސް އުޅޭ ހުރިހާ ސަރަޙައްދުތަކުގައި ދުންފަތުގެ އިސްތިއުމާލުކުރުން މަނާކުރާނެ ކަމަށް އެ ޤައުމުގެ ހެލްތު މިނިސްޓަރު ކެތަރިން ވޮޓްރިން އިއުލާން ކުރައްވައިފިއެވެ. އޭނާ ވިދާޅުވީ މިކަމުގެ މަގުސަދަކީ ކުޑަކުދިންގެ ސިއްހަތު ރައްކާތެރިކޮށް، ދުންފަތުގެ އިސްތިއުމާލުކުރުން މަދުކުރުމެވެ. އަދި މި ޤަވާޢިދާއި ޚިލާފުވާ ފަރާތްތައް 135 ޔޫރޯ އާއި ހަމައަށް ޖޫރިމަނާ ކުރާނެ އެވެ. މިއީ ދިވެހި ރުފިޔާއިން ބަލާނަމަ 2500 އެއްހާ ރުފިޔާއެވެ.

ފްރާންސުން ބޭނުން ވަނީ 2032 ވަނަ އަހަރުގެ ނިޔަލަށް ދުންފަތުގެ އިސްތިއުމާލު ނުކުރާ ޖީލެއް އުފެއްދުމަށެވެ.

ފްރާންސްގައި ދުންފަތުގެ އިސްތިއުމާލު ކުރުމުގެ ނިސްބަތް ވަރަށް ބޮޑަށް ދަށްވެފައިވާއިރު، އުމުރުން 18–75 އަހަރުގެ ބޮޑެތި މީހުންގެ ތެރެއިން ދުންފަތުގެ އިސްތިޢުމާލު ކުރަނީ ގާތްގަނޑަކަށް %25 ޕަސެންޓެވެ. ދުންފަތުގެ ސަބަބުން ފްރާންސުގައި އަހަރަކު ގާތްގަނޑަކަށް 75،000 މީހުން މަރުވެއެވެ.

މި އަހަރުގެ ޖެނުއަރީ މަހާއި ހަމަޔަށް ޢާންމު ކޮށްފައިވާ މަޢުލޫމާތުން އެނގޭ ގޮތުގައި އެ ޤައުމުގެ މިހާރުގެ އާބާދީ އަކީ 68.6 މިލިއަން މީހުންނެވެ.