ފްރާންސްގެ ސުޕަމާކެޓްތަކުގެ ފިނިކުރާ ނިޒާމުތަކަށް އަމާޒުކޮށްދިން ވަރުގަދަ ސައިބަރ ހަމަލާއެއްގެ ސަބަބުން، ފްރިޖްތަކާއި ފްރީޒަރުތަކުގެ ފިނިހޫނުމިން 50 ޑިގްރީ ސެލްސިއަސްއަށްވުރެ މައްޗަށް އަރައި، ކާބޯތަކެތި ހަލާކުވެ އަދި ބައެއް ފިހާރަތަކުގައި ރޯވުމުގެ ހާދިސާތައް ހިނގައިފިއެވެ.
"އިންޓަމާޝޭ" އާއި "ކޫޕަރޭޓިވް ޔޫ" އަދި "އީ. ލެކްލަރކް" ފަދަ މަޝްހޫރު ވިޔަފާރިތަކުން ވަނީ މި ހަމަލާ ލިބިފައިވާކަން ކަށަވަރުކޮށްދީފައެވެ. އެގޮތުން އިންޓަމާޝޭގެ 300 އަށްވުރެ ގިނަ ފިހާރައަށާއި، ކޫޕަރޭޓިވް ޔޫގެ 100 އަށްވުރެ ގިނަ އައުޓްލެޓްތަކަށް ވަނީ މި ހަމަލާގެ އަސަރުކޮށްފައެވެ. މީގެއިތުރުން "ކެރެފޯ" ގެ 80 ސުޕަމާކެޓަށާއި، "މޮނޮޕްރިކްސް" ގެ ފިހާރަތަކަށްވެސް މި ހަމަލާގެ ސަބަބުން ގެއްލުން ލިބިފައިވެއެވެ.
ޕެރިސް ޕްރޮސިކިއުޓަރ އޮފީހުން ބުނީ މި ބޮޑު ހަމަލާގެ ސަބަބުން ފްރާންސްގެ އެކި ކަންކޮޅުތަކުގައި ހުރި މައިގަނޑު ކާބޯތަކެތި ވިއްކާ ފިހާރަތަކުގެ ކަނެކްޓެޑް ފްރިޖް ނިޒާމުތަކަށް ބޮޑެތި ގެއްލުންތަކެއް ލިބި، މުދާ ހަލާކުވުމާއި އަލިފާނުގެ ހާދިސާތައް ހިނގާފައިވާ ކަމަށެވެ. މިކަމާ ގުޅިގެން ފްރާންސްގެ ބޮޑުވަޒީރު ސެބަސްޓިއަން ލެކޯނޫ ވަނީ އެ ގައުމުގެ ގައުމީ ސައިބަރ ސެކިއުރިޓީ އެޖެންސީ (އޭ.އެން.އެސް.އެސް.އައި) މެދުވެރިކޮށް ހާއްސަ ތަހުގީގެއް ފެށުމަށް އަންގަވާފައެވެ. އަދި މިފަދަ ނުރައްކާތައް އެހެން ގައުމުތަކަށްވެސް ކުރިމަތިވެދާނެތީ، ޔޫރަޕްގެ އެހެނިހެން ގައުމުތަކާ ގުޅިގެން ވެސް މަސައްކަތްކުރަމުންދާ ކަމަށް މަސްދަރުތަކުން ބުނެއެވެ.
Advertisement
އިންޓަމާޝޭގެ ސީއީއޯ، ތިއަރީ ކޮޓިލާޑް ވިދާޅުވިގޮތުގައި، މި ހަމަލާގެ ސަބަބުން އެއް ދުވަހުގެ ތެރޭގައި އެކަނިވެސް އެތަކެއް މިލިއަން ޔޫރޯގެ ގެއްލުން ލިބިފައިވާކަމަށް ލަފާކުރެވެއެވެ. ހެކަރުން ވަނީ ރިމޯޓްކޮށް ސިސްޓަމްތަކަށް ވަދެ، ފިނިކުރާ ނިޒާމުތައް ކުއްލިއަކަށް ނިވި ހޫނުވާގޮތަށް ބަދަލުކޮށްލާފައެވެ. މިއީ ތާޒާ ކާބޯތަކެއްޗާއި ފިނިކުރި ތަކެތި އެއްކޮށް ހަލާކުކޮށްލުމަށް ދިން ހަމަލާއެއް ކަމަށް ބީ.އެފް.އެމް ޓީވީން ރިޕޯޓުކޮށްފައިވެއެވެ.
ފްރާންސްގެ ކަމާބެހޭ ފަރާތްތަކުން ބެލި ބެލުމުން އެނގުނުގޮތުގައި، މި މައްސަލަ ދިމާވެފައިވަނީ ޑެންމާކުގެ ކުންފުންޏެއް ކަމަށްވާ "ޑެންފޮސް" ގެ ސޮފްޓްވެއަރ ނިޒާމުތަކުގައި ހުރި ބަލިކަށިކަމެއްގެ ސަބަބުންނެވެ. ޑެންފޮސް އިން ބުނީ މައްސަލަ ދިމާވެފައިވަނީ އަޕްޑޭޓް ނުކުރެވޭ ބާ ފަންނީ ވަސީލަތްތައް ބޭނުންކުރަމުންދިޔަ ޔުނިޓްތަކަށް ކަމަށެވެ. ނަމަވެސް ސައިބަރ ސެކިއުރިޓީ މާހިރުން ފާހަގަކުރާ ގޮތުގައި، ސްޕެއިން، ޕޯޗުގަލް، ޕޮލެންޑް، ޖަރުމަނު އަދި ބެލްޖިއަމް ފަދަ ގައުމުތަކަށްވެސް މި މައްސަލައިގެ އަސަރުކޮށްފައިވެއެވެ.
ސައިބަރ ސެކިއުރިޓީ އެނަލިސްޓުން ވިދާޅުވާ ގޮތުގައި އިންޓަނެޓާ ގުޅުވާފައި ހުންނަ މިފަދަ އިންފްރާސްޓްރަކްޗަރތަކަށް ދެވޭ ހަމަލާތަކަކީ މުޅި ދުނިޔެއަށް ލިބުނު ހޭލުންތެރިކަމުގެ ފިލާވަޅެކެވެ. ކުރިއަށް އޮތް ތަނުގައި މިފަދަ ހަމަލާތައް ހޮސްޕިޓަލްތަކަށާއި ހަކަތަ ފޯރުކޮށްދޭ ނިޒާމުތަކަށް އަމާޒުވެދާނެ ކަމަށް ވިދާޅުވެ މާހިރުން ވަނީ ކަންބޮޑުވުން ފާޅުކޮށްފައެވެ.
