ރާއްޖޭގައި ސްކައުޓް ހަރަކާތް ފުޅާކުރުމަށް ސަރުކާރުގެ ފަރާތުން ދޭންޖެހޭ އެއްބާރުލުން ފުރިހަމައަށް ލިބޭނެކަމަށް ރައީސުލްޖުމްހޫރިއްޔާ އަދި ޗީފް ސްކައުޓް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ، ޗީފް ސްކައުޓަށް ވޯލްޑް ސްކައުޓް ބެޖް އެރުވުމަށާއި، ސްކައުޓް އެވޯޑް ދެއްވުމަށް މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ރައީސް ވިދާޅުވީ، ސްކައުޓް ހަރަކާތް ރާއްޖޭގައި ފުޅާކުރުމަށް ވަރަށް ގިނަ މަސައްކަތްތަކެއް ކުރަންޖެހިފައިވާ ކަމަށެވެ. އަދި މިހާތަނަށް މި ހަރަކާތް ރާއްޖޭގައި ކުރިއަށް ގެންގޮސްފައިވަނީ ގިނަ ގޮންޖެހުންތަކާ ކުރިމަތިލަމުންކަމަށް ފާހަގަކުރެއްވިއެވެ.
Advertisement
"އަޅުގަނޑުމެންގެ ޤައުމުގައި މި ހަރަކާތް ދިރުވާ އާލާކޮށް ވަރުގަދަކުރުމަށް އަޅުގަނޑު ވަރަށް ބޭނުން. އެހެންވީމަ ސަރުކާރުން ހުރިހައި ޒާތެއްގެ ވަސީލަތްތައް ޝާމިލްވާގޮތަށް ފަހިކޮށްދިނުމުގެ ވާހަކަ މިދަންނަވަނީ." ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ކުރިއަށް އޮތްތަނުގައި ސްކައުޓް ހަރަކާތުގެ އިތުރުން ކެޑޭޓް އަދި ގާލްގައިޑް ފަދަ ހަރަކާތްތަކަށްވެސް ސަރުކާރުގެ ފަރާތުން ކޮށްދޭންޖެހޭ ހުރިހާ މަސައްކަތެއް ވަރަށް ސަމާލުކަމާއެކު ކޮށްދޭނެކަމުގެ ޔަޤީންކަން ދެއްވާ ކަމަށެވެ.
ރާއްޖޭގައި ސްކައުޓް ހަރަކާތް ފެށިތާ 69 އަހަރު ވެފައިވާއިރު، މި ހަރަކާތުން ވަނީ ފަޚުރުވެރި ކާމިޔާބީތަކެއް ހޯދާފައިކަމަށް ރައީސް ފާހަގަކުރެއްވިއެވެ. އަދި ކުދިކުދި ކަންކަމުން ފެށިގެން ބޮޑެތި ޤައުމީ ކާރިސާތަކުގައިވެސް ސްކައުޓުންގެ ބައިވެރިވުން ފާހަގަކުރެވޭ މިންވަރަށް ފެންނަމުންދާކަމަށް ރައީސް ވިދާޅުވިއެވެ.
