ރައީސްގެ ދެކަނބަލުން ޙައްޖަށް ވަޑައިގަންނަވަނީ

އަައިޝަތު ޒީނާ

413 ދުވަސް ކުރިން - 30 މެއި 2025 15:23

ރައީސްގެ ދެކަނބަލުން މީގެ ކުރިން ޢުމްރާއަށް ފުރާވަޑައިގެންނެވުމަށް އެއަރޕޯޓުގައި. / ފޮޓޯ: ރައީސް އޮފީސް

ޚުލާސާ

ރައީސް ވިދާޅުވީ އެއީ ސަޢޫދީ ސަރުކާރުގެ ފަރާތުން ދެއްވާ ޚާއްޞަ ދަތުރެއް ކަމަށާއި، ދަތުރުގެ ހުރިހާ އިންތިޒާމެއް ހަމަޖައްސަވާދެއްވާފައި ވަނީ ހިލޭ ރޯޔަލް ކޯޓުން ކަމަށް.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އަނބިކަނބަލުން ސާޖިދާ މުހައްމަދު މިއަހަރުވެސް ޙައްޖަށް ވަޑައިގަތުމަށް ނިންމަވައިފިއެވެ.

އެމަނިކުފާނު މިކަން ހާމަކުރެއްވީ، "ރައްޔިތުންނާއެކު" ސިލްސިލާ ޕޮޑްކާސްޓްގެ 7 ވަނަ އެޕިސޯޑްގައި ވާހަކަފުޅުދައްކަވަމުންނެވެ.

ރައީސް ވިދާޅުވީ އެއީ ސަޢޫދީ ސަރުކާރުގެ ފަރާތުން ދެއްވާ ޚާއްޞަ ދަތުރެއް ކަމަށާއި، ދަތުރުގެ ހުރިހާ އިންތިޒާމެއް ހަމަޖައްސަވާދެއްވާފައި ވަނީ ހިލޭ ރޯޔަލް ކޯޓުން ކަމަށެވެ.

އެގޮތުން ވަކިން ފްލައިޓެއްވެސް ހަމަޖައްސަވައި ދެއްވާފައިވާކަން ފާހަގަކުރައްވާ ރައީސް ވިދާޅުވީ ސަރުކާރުން އެއްވެސް ޚަރަދެއް އެކަމަށް ނުކުރާ ކަމަށާއި ޗާޓަރަށް ވެސް އެއްވެސް ޚަރަދެއް ނުކުރާ ކަމަށެވެ.

މީގެ އިތުރުން ރައީސްގެ ވާހަކަފުޅުގައި ވަނީ މިފަހަރު ޙައްޖާޖީންނަށް ހަމަޖައްސަވާދެއްވާފައިވާ އިންތިޒާމްތައް ވަރަށް ފުރިހަމަކަން ފާހަގަކުރައްވާފައެވެ.

އެހާ ފުރިހަމަ އިންތިޒާމްތަކެއް ހަމަޖެހިގެން ދިޔައީ ސަޢޫދީ ސަރުކާރާއި ދިވެހި ސަރުކާރުން ގުޅިގެން ކުރެއްވި މަސައްކަތުންކަމުގައި ރައީސް ފާހަގަކުރެއްވިއެވެ. އަދި އެކަމުން ފެންނަނީ ސަޢޫދީ ސަރުކާރުން ރާއްޖެއާމެދު ބަހައްޓަވާ ގާތްކަންކަމަށާއި، އެގައުމުން ރާއްޖެއަށް ދެއްވާ އަހައްމިއްޔަތުކަން ކަމުގައި ރައީސް ފާހަގަކުރެއްވިއެވެ. އަދި އެކަމަށްޓަކައި އެމަނިކުފާނު ވަނީ ޝުކުރު އަދާކުރައްވާފައެވެ.

ރައީސް ޑރ. މުހައްމަދު މުއިއްޒު ސަޢުދީ ޢަރަބިއްޔާ