ފްލެޓާ ގުޅޭ އިތުރު ދާއިމީ ލިސްޓެއް ނުނެރޭނެ ކަމަށާއި، ޝަކުވާ ފޯމުތައް ބެލުމަށްފަހު ފްލެޓް ނުލިބޭނެ ފަރާތްތަކަށް އެކަން އަންގަމުންދާނެ ކަމަށް އިމާރާތްކުރުމާއި ގެދޮރުވެރިކަމާއި ބިނާވެށްޓާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވަޒީރު ވިދާޅުވީ، މިހާރު ކުރިއަށްދަނީ 2023 ވަނަ އަހަރުގެ ނޮވެންބަރު 15 ގައި ނެރުނު ލިސްޓުގައި ހިމެނޭ މީހުންގެ ތެރެއިން ޝަރުތު ހަމަނުވާ ފަރާތްތައް ދެނެގަތުމުގެ މަސައްކަތް ކަމަށެވެ. އަދި މި މަސައްކަތް ނިމުމުން، ޝަރުތު ހަމަނުވާ ފަރާތްތަކަށް އެކަން އަންގާނެ ކަމަށާއި، އެ ފަރާތްތަކަށް ޖަވާބުދާރީވުމުގެ ފުރުސަތު ދެވޭނެ ކަމަށްވެސް ވިދާޅުވިއެވެ.
ވަޒީރު އިތުރަށް ވިދާޅުވީ، ލިސްޓުގައި މައްސަލައެއް ނެތި ޝަރުތު ހަމަވާ ފަރާތްތަކުގެ އެގްރީމެންޓްތައް ހެދުމުގެ މަސައްކަތް އަވަހަށް ފަށާނެ ކަމަށާއި، ފްލެޓްތައް ނިމެމުންދާ ވަރަކަށް އެ ފަރާތްތަކާ ހަވާލުކުރަމުން ދާނެ ކަމަށެވެ.
Advertisement
"ޖުލައި މަހު އެންމެ ފުރަތަމަ މީހުންނަށް ފްލެޓްތައް ހަވާލުކުރެވި، އެތާނގައި އުޅެވޭވަރު ވާނެ. ސަރުކާރުގެ އަމާޒަކީ ސެޕްޓެންބަރުގެ ނިޔަލަށް ހުރިހާ ފްލެޓްތައް ނިންމާ ހަވާލުކުރުން. އަދި މުޅި މައްސަލައަށް ހައްލު އައުން،" ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވި ގޮތުގައި، 1000 ހައުސިންގ ޔުނިޓުގެ އިމާރާތުގެ މަސައްކަތް މިހާރު ވަނީ މުޅިން ނިމިފައެވެ. ނަމަވެސް، އެ ތަންތަނުގައި ޔުޓިލިޓީ ޚިދުމަތްތައް ގުޅުމުގެ މަސައްކަތް މިހާރު ކުރިއަށްދާ ކަމަށާއި، ޖުލައިގެ ނިޔަލަށް އިތުރު 1000 ޔުނިޓް ނިމި، މުޅި މަޝްރޫޢު ސެޕްޓެންބަރަށް ނިންމާނެ ކަމަށް ވަޒީރު ވިދާޅުވިއެވެ.
މި ބައްދަލުވުމުގައި ވަޒީރު ފާހަގަކުރެއްވި ގޮތުގައި، ކުރީގެ ސަރުކާރުން 2023 ވަނަ އަހަރުގެ ނޮވެންބަރު 15 ގައި ނެރުނު ލިސްޓަކީ، ގިނަ ޝަކުވާތަކާ ގުޅިގެން އޭސީސީން އެ މަސައްކަތް މަޑުޖައްސާލުމަށް އަންގާފައި ވަނިކޮށް ނެރެފައިވާ ލިސްޓެކެވެ. މި ސަރުކާރުން ޚާއްސަ ކޮމިޓީއެއް އެކުލަވާލައި ބެލުމަށްފަހު ހާމަކޮށްފައިވަނީ ފްލެޓް ލިބޭނެ ކަމަށް ކަނޑައެޅި 2180 މީހުން ޝަރުތު ހަމަނުވާ ކަމަށެވެ.
