ފަލަސްޠީނުގެ ޣައްޒާގައި ދިރިއުޅޭ ރައްޔިތުން ބަނޑަށްޖެހި މަރާއި ހަނގުރާމަކުރަމުން ދާތީވެ، ގޮތް ހުސްވެ އެންމެފަހުން ކާނެ އެއްޗެއް ހޯދުމަށް ޣައްޒާގެ މެދުތެރޭގައި ހުރި ސަރަހައްދެއްގައި ހުރި އެކުވެރި ދައުލަތްތަކުގެ (އދ.) ގުދަނަކަށް ވަދެ، އެތަނުން ކާބޯތަކެތި ނެގުމަށް މަޖުބޫރުވެއްޖެއެވެ.

މި ހާދިސާ ހިނގާފައިވަނީ ޔަހޫދީން މާރިޗު 2 ވަނަ ދުވަހަށް ފަހު ޣައްޒާ އަށް ވަދެނުކުމެވޭނެ ހުރިހާ ދޮރުތައް ބަންދުކޮށް، ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމަށް ހުރަސް އެޅުމާއި ގުޅިގެންނެވެ. މީގެ އިތުރުން، ޞިއްޙީ ފަރުވާއަށް ބޭނުންވާ ބޭހާއި އެހެނިހެން ސާމާނާއި ތެޔޮ އެތެރެ ކުރުން ވެސް އޮތީ ހުއްޓުވާފައެވެ.

^{ޣައްޒާ ރައްޔިތުން ބަނޑަށްޖެހި މަރުވާތީ ގޮތްހުސްވެ އދ. ގުދަނަކަށް ވަދެ ކާބޯތަކެއްޗާއި އެނޫންވެސް އަތުޖެހުނު އެއްޗެއް ހިފައިގެން ދަނީ.}

އދ. ގެ ކާބޯތަކެއްޗާ ބެހޭ ޕުރޮގުރާމު (ޑަބްލިޔުއެފްޕީ) އިން ބުނެފައިވާ ގޮތުގައި، ކާއެއްޗެހި ނަގަން ގުދަނަށް ވަދެ އުޅުނު ހާދިސާގައި ދެ މީހަކު ޝަހީދުވެފައިވާ ކަމުގެ މަޢުލޫމާތު ލިބިފައިވެއެވެ. އަދި މިފަދަ ހާދިސާތައް ތަކުރާރު ވިޔަ ނުދިނުމަށް، ޣައްޒާއަށް ކާބޯތަކެތި އެތެރެ ކުރުމަށް އޮތް ހުރަސްތައް ވަގުތުން ނައްތައިލުމަށް ޔަހޫދީންނަށް ގޮވައިލާފައިވެއެވެ.

ޣައްޒާގައި ދިރިއުޅޭ 2.1 މިލިޔަނެއްހާ މީހުން މިހާރު ވަނީ ބަނޑަށްޖެހުމުގެ ބިރާއި ކުރިމަތިލާންޖެހިފައެވެ. އދ. ގެ މެދުއިރުމަތީގެ މަންދޫބު ސިގްރިޚް ކާޚް ވަނީ ޣައްޒާއަށް އެތެރެ ކުރެވޭ ކާބޯތަކެތީގެ އަދަދު މަދުވުމާއި ގުޅިގެން ކަންބޮޑުވުން ފާޅުކުރައްވާފައެވެ.

ޣައްޒާ ހިޔުމެނިޓޭރިޔަން ފައުންޑޭޝަން (ޖީއެޗްއެފް) މެދުވެރިކޮށް ކާބޯތަކެތި ބެހުމުގެ މަސައްކަތް ފެށިފައިވީ ނަމަވެސް، އެ ޖަމުޢިއްޔާއިން ކާބޯތަކެތި ބަހަމުން ދިޔަ މަރުކަޒަކަށް އެއްވި މީހުންނަށް އަމާޒުކޮށް ޔަހޫދީ ފައުޖުން ޙަމަލާދީ، ގިނަ އަދަދެއްގެ ބަޔަކު ޝަހީދު ކޮށްލާފައިވާކަން ފާހަގަކުރެވެއެވެ.

އދ. ގެ ސަލާމަތީ މަޖިލީހުން ވަނީ ޣައްޒާގައި ޔަހޫދީން ހިންގަމުންދާ ޤަތުލުޢާންމު ހުއްޓުވުމަށް މަސައްކަތް ކުރަމުންދާކަން އިޢުލާނުކޮށްފައެވެ. ނަމަވެސް، ޖީއެޗްއެފް މެދުވެރިކޮށް ޣައްޒާގެ ރައްޔިތުންނަށް ކާބޯތަކެތި ފޯރުކޮށްދިނުމުގެ މަސައްކަތް ޔަހޫދީންގެ އަތްދަށަށް ދޫކޮށްލުމަށް އދ. އިން ދަނީ އިންކާރު ކުރަމުންނެވެ.