މޯލްޑިވްސް ޕޯސްޓް ލިމިޓެޑްގެ ނަމުގައި ސްކޭމް މެސެޖުތަކެއް ފޮނުވަމުންދާތީ، އާންމު ރައްޔިތުން ސަމާލުވުމަށް އެ ކުންފުނިން މިއަދު އިލްތިމާސްކޮށްފިއެވެ.
ޕޯސްޓް އޮފީހުގެ ނަމުގައި ފޮނުވަމުންދާ މި ސްކޭމް މެސެޖުތަކުގައި ބުނެފައިވަނީ، ކަސްޓަމަރުގެ އެޑްރެސް ނުބައިކޮށް ޖަހާފައި އޮތުމުގެ ސަބަބުން ޕެކޭޖް ޑެލިވަރ ނުކުރެވި ހުރި ކަމަށާއި، ރަނގަޅު އެޑްރެސް ޖެހުމަށްޓަކައި ވަކި ލިންކަކަށް ފިތުމަށެވެ.
ނަމަވެސް، މޯލްޑިވްސް ޕޯސްޓް ލިމިޓެޑުން މިއަދު ނެރުނު ބަޔާނެއްގައި ބުނީ، އެއްވެސް ހާލެއްގައި އައިޓަމްގެ ޑެލިވަރީ އެޑްރެސް ހޯދުމަށް އެ ކުންފުނިން ކަސްޓަމަރުންނަށް މެސެޖެއް ނުފޮނުވާނެ ކަމަށެވެ. އަދި ޒާތީ އަދި މާލީ މަޢުލޫމާތު ރައްކާތެރިކުރުމަށްޓަކައި، މިފަދަ ލިންކްތަކަށް ނުފިތުމަށް ޕޯސްޓް އޮފީހުން ވަނީ އާންމުންނަށް އިލްތިމާސްކޮށްފައެވެ.
މި މައްސަލައާ ގުޅިގެން މޯލްޑިވްސް ޕޮލިސް ސަރވިސްގެ އެންޓި ސްކޭމް ސެންޓަރުން ވެސް ވަނީ އާންމުންނަށް ޚާއްޞަ އިރުޝާދުތަކެއް ދީފައެވެ. މީގެ ތެރޭގައި އެއްވެސް ލިންކަކަށް ނުފިތުމާއި، ވެރިފިކޭޝަން ކޯޑު އެއްވެސް ފަރާތަކާއި ހިއްސާނުކުރުން، އަދި ދަންނަ މީހެއްގެ ފަރާތުން އައި މެސެޖެއް ކަމުގައިވިޔަސް ސަމާލުވުމަށް އިރުޝާދު ދީފައިވެއެވެ.
މިފަދަ ސްކޭމް މެސެޖުތައް އިތުރުވަމުންދާ ދަނޑިވަޅެއްގައި، ރައްޔިތުން ވީހާވެސް ބޮޑަށް ސަމާލުވެ، ޝައްކުކުރެވޭ އެއްވެސް މުޢާމަލާތެއް ކުރުމުގެ ކުރިން ކަމާބެހޭ ފަރާތްތަކާއެކު މަޝްވަރާކުރުމަށް ކަމާބެހޭ އިދާރާތަކުން އިލްތިމާސްކޮށްފައިވެއެވެ.
