ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ޑިރެކްޓަރުންގެ ބޯޑުގެ ޗެއާޕާސަން ކަމަށް މ.ރަނިކަ، އަލްފާޟިލް އިބްރާހިމް އަބްދުއްރައްޒާގު ހަލީމް އަދި ބިޒްނަސް ސެންޓާ ކޯޕަރޭޝަން ލިމިޓެޑް ޑިރެކްޓަރުންގެ ބޯޑުގެ ޗެއާޕާސަން ކަމަށް ގއ. ވިލިނގިލި، ވައިޖެހޭގެ، އަލްފާޟިލް ޝަހީދު މުހައްމަދު އައްޔަނުކޮށްފި އެވެ.

ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް އަކީ ރާއްޖެ އަށް ބޭސް އެތެރެކުރުމަށް ސަރުކާރުން އުފައްދާފައިވާ ހާއްސަ ކުންފުންޏެކެވެ. ސެޕްޓެމްބަރު އުފެއްދި މި ކުންފުންޏަކީ ސަރުކާރުގެ ސައްތައިން ސައްތަ ހިއްސާ އެކުލެވޭ ކުންފުންޏެކެވެ. މި ކުންފުނީގެ ބޭނުމަކީ ރާއްޖެއަށް ބޭސް އެތެރެކުރުމުގެ މަސައްކަތް ފުޅާކޮށް އަގުހެޔޮކޮށް އެތެރެކުރުމެވެ.

މި ކުންފުންޏަށް އައްޔަނުކުރެއްވި އަބްދުއްރައްޒާގު ހަލީމަކީ އަކީ ގްރޫޕް އޮފް ހޮސްޕިޓަލްސްގެ ސީއީއޯ އެވެ. އަދި ބީސީސީގެ ޗެއާޕާސަން ކަމަށް އައްޔަނުކުރެއްވި ޝަހީދަކީ އާސަންދަ ބޯޑުގެ ޗެއާޕާސަންކަމުގެ މަގާމުގައި އިންނެވި ބޭފުޅެކެވެ. އޭނާ މިއަދު ވަނީ އެ މަގާމުން ވަކިކޮށްފަ އެވެ.

ޕީސީބީ އިން ވަނީ ސަރުކާރުގެ ބައެއް އެހެން ކުންފުނިތަކުގެ ބޯޑަށް ބަދަލު އައިސްފައިވާ ކަމަށް އިއުލާނުކޮށްފަ އެވެ. އެގޮތުން އާސަންދަ ކޮމްޕެނީ ލިމިޓެޑްގެ ބޯޑުން ތިން މެންބަރަކު ވަނީ ވަކިކޮށްފަ އެވެ. އެއީ؛ ބީސީސީގެ ޗެއާޕާސަން ކަމަށް އައްޔަނުކުރެއްވޮ ޝަހީދު މުހައްމަދުގެ އިތުރުން، އއ. ރަސްދޫ، ފުނަމާލެ، އަހްމަދު ޝާކިރު އަދި ކ. ގުރައިދޫ، ސީޕްރައިޒް އާއިޝަތު ޒީނާ އެވެ.

އަހްމަދު ޝާކިރު އާސަންދައިގެ ބޯޑުން ވަކިކޮށް ހަމަ މިއަދު ވަނީ އައިލެންޑް އޭވިއޭޝަން ސާވިސް ލިމިޓެޑްގެ ޑިރެކްޓަރުންގެ ބޯޑުގެ ނޮން-އެގްޒެކެޓިވް މެންބަރުގެ މަގާމަށް އައްޔަނުކޮށްފަ އެވެ.

ނިމިދިޔަ އާދީއްތަ ދުވަހު މޯލްޑިވްސް ޕޯސްޓް ލިމިޓެޑްގެ ޑިރެކްޓަރުންގެ ބޯޑުގެ މެންބަރު ކަމުގެ މަގާމަށް ގއ. ދެއްވަދޫ ނަސްރީނުވިލާ ޝަހީދު އިބްރާހިމް ވަނީ އައްޔަނުކޮށްފަ އެވެ. އަދި އެ ކުންފުނީގެ ޑީއެމްޑީގެ މަގާމަށް އޭނާ ވަނީ އިއްޔެ އައްޔަނުކޮށްފަ އެވެ. ޝަހީދު ކުރިން ހުންނެވީ ވެމްކޯގެ ޑީއެމްޑީ މަގާމުގަ އެވެ.