ލިބޭ އާމްދަނީއަށް ބަލައިގެން، އާސަންދަ ކަވަރޭޖު ދެވޭ އުސޫލަށް އަންނަމަހުން ފެށިގެން ގެންނަ ބަދަލާއެކު، އަހަރު ދުވަހުގެ ތެރޭގައި 287 މިލިއަން ރުފިޔާ، ރައްޔިތުންގެ އެހެންކަންކަމަށް ޚަރަދުކުރުމަށް ދަޢުލަތަށް ލިބޭނެކަން ރައީސުލްޖުމްހޫރިއްޔާ ފާހަގަކުރައްވައިފިއެވެ.

ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި އެމަނިކުފާނު ވިދާޅުވީ މި ބަދަލުގެ ސަބަބުން މި އަހަރުވެސް އާސަންދައަށް ކުރާ ޚަރަދު ކުޑަކުރެވޭނެކަމަށާ، ބޮޑު ބަދަލެއް ފެނިގެންދާނީ ކުރިއަށް އޮތް އަހަރުގެ ތެރޭގައި ކަމަށެވެ.

ސަރުކާރުން ނިންމާފައި ވަނީ މަހެއްގެ މައްޗަށް، 60،000 ރުފިޔާއަށްވުރެ މަތިން މުސާރަ ލިބޭ ފަރާތްތަކަށް މިހާރު އޮންނަ ގޮތަށް، އާސަންދައިން ފުލް ކަވަރޭޖު ނުދިނުމަށެވެ. އަދި 60،000 ރުފިޔާއަށްވުރެ މަތިން މުސާރަ ލިބޭ ފަރާތްތަކަށް، ކޯޕޭ ނުވަތަ ޕްރީޕޭ ނިޒާމެއްގެ ތެރެއިން އާސަންދަ ލިބޭނެކަމުގައި ރައީސް ވިދާޅުވިއެވެ.

ދިވެހިރާއްޖޭގެ ހުރިހާ ރައްޔިތުންނަށް ބޭސްފަރުވާގެ ޚިދުމަތް، ހިލޭ ލިބޭނެ މަގުފަހިކޮށްދިނުމަށްޓަކައި ދިވެހި ސަރުކާރުން ގާއިމުކޮށްފައިވާ ގައުމީ ހެލްތު އިންޝުއަރެންސް ނިޒާމު ކަމުގައިވާ، އާސަންދައަށް މިގެނެވޭ ބަދަލުތަކުގެ އިތުރު ތަފްސީލުތައް އެކަމާއި ގުޅުންހުރި އިދާރާތަކުން ހާމަކުރައްވާނެއެވެ.