ގްލޯބަލް ދުކާންއަށް ޕޯސްޓް މެދުވެރިކޮށް ފައިސާ ދެއްކޭނެ ގޮތް ހަމަޖައްސައިފި

އިންޑިއާގެ މަޝްހޫރު އީ-ކޮމާސް މާކެޓްޕްލޭސް "ގްލޯބަލް ދުކާން" އިން ވިޔަފާރިކުރާ ދިވެހި ކަސްޓަމަރުންނަށް މޯލްޑިވްސް ޕޯސްޓް މެދުވެރިކޮށް ފަސޭހަކަމާއެކު ފައިސާ ދެއްކޭނެ އިންތިޒާމު ހަމަޖައްސައި، އެ ހިދުމަތް ރަސްމީކޮށް ތައާރަފުކޮށްފި އެވެ.

މި އައު އިންތިޒާމުގެ ދަށުން، ގްލޯބަލް ދުކާން މެދުވެރިކޮށް ވިޔަފާރިކުރައްވާ ކަސްޓަމަރުން ޗެކްއައުޓް ކުރައްވާ ވަގުތު "ޕޭ ތުރޫ މޯލްޑިވްސް ޕޯސްޓް" އިހްތިޔާރު ކުރެއްވުމަށްފަހު، އެތަނުގައި ދީފައިވާ އިރުޝާދުތަކާ އެއްގޮތަށް ފައިސާގެ މުއާމަލާތްތައް ފުރިހަމަކުރެވޭނެ އެވެ. އަދި މިގޮތުން ފައިސާ ދައްކަވާއިރު ޝަރުތުހަމަވާ ކަސްޓަމަރުން ބޭނުންވާނަމަ، ދިވެހި ރުފިޔާއިން ފައިސާ ދެއްކުމަށްޓަކައި ޕޭމަންޓް ލިންކެއް ގްލޯބަލް ދުކާން އެޕްލިކޭޝަން މެދުވެރިކޮށް ލިބިގެންދާނެ އެވެ.

މި އައު ހިދުމަތަކީ ގްލޯބަލް ދުކާން މެދުވެރިކޮށް ތަކެއްޗަށް އޯޑަރުކުރާއިރު ބޭރުގެ ފައިސާއިން މުއާމަލާތްކުރަންޖެހޭ ބައިނަލްއަގުވާމީ ޕޭމަންޓް މެތަޑްތަކުގެ ބަދަލުގައި، ދިވެހި ރުފިޔާއިން ފަސޭހަކަމާއެކު ފައިސާ ދެއްކުމަށް ހުޅުވިގެންދިޔަ އަގުހުރި ފުރުސަތެކެވެ. މީގެ ސަބަބުން ދިވެހިރާއްޖޭގެ ކަސްޓަމަރުންނަށް ގްލޯބަލް ދުކާންގެ ޚިދުމަތްތައް ހޯދުމުގައި އިތުރު ފަސޭހަތަކެއް ލިބި، ފައިސާ ދެއްކުމުގެ މަރުހަލާ ކުރިއަށްވުރެ ބޮޑަށް ލުއިފަސޭހަވެގެންދާނެ އެވެ.

މޯލްޑިވްސް ޕޯސްޓާއި އިންޑިއާ ޕޯސްޓް ގުޅިގެން ފޯރުކޮށްދޭ މި ހިދުމަތުގެ ދަށުން، ގްލޯބަލް ދުކާން މެދުވެރިކޮށް ގަންނަ ތަކެތި ރާއްޖޭގެ ކޮންމެ ހިސާބަކަށްވެސް ޑެލިވަރީ ކޮށްދިނުމުގެ އިންތިޒާމު ކުރިއެކޭވެސް އެއްފަދައިން ވަނީ ހަމަޖެހިފަ އެވެ. އަދި މި ޕްލެޓްފޯމުން ވިޔަފާރިކުރުމަށް އިންޑިއާގެ އެޑްރެހެއް ބޭނުންނުވާނެކަމަށްވެސް އެ ކުންފުނިން ހާމަކުރި އެވެ.

ދިވެހިންގެ މެދުގައި ބޮޑު މަގުބޫލުކަމަކާއި އިތުބާރެއް ހޯދާފައިވާ ގްލޯބަލް ދުކާންގައި ހިމެނޭ މަޝްހޫރު އީ-ކޮމާސް ޕްލެޓްފޯމްތަކުގެ ތެރޭގައި އެމެޒަން، މިންތްރާ، ފްލިޕްކާޓް، ނައިކާ، ނައިކާ ފެޝަން އަދި އިކިއާ ފަދަ ޕްލެޓްފޯމްތައް ހިމެނެ އެވެ. މި ޕްލެޓްފޯމްތައް މެދުވެރިކޮށް ފެޝަން އަދި ލައިފްސްޓައިލް، އިލެކްޓްރޯނިކްސް ސާމާނާއި އެކްސެސަރީޒް، ގޭތެރެއާއި ބަދިގެއަށް ބޭނުންވާ ސާމާނު، އަދި ބިއުޓީ އެންޑް ވެލްނެސް އުފެއްދުންތަކުގެ އިތުރުން އެހެނިހެން ތަފާތު ގިނަ ބާވަތްތައްވެސް ފަސޭހަކަމާއެކު ލިބިގެންދާނެ އެވެ.

ގްލޯބަލް ދުކާންއިން ވިޔަފާރިކުރާ ދިވެހި ކަސްޓަމަރުންނަށް ފަސޭހަކަމާއެކު ފައިސާ ދެއްކޭނެ ގޮތް ހަމަޖެހިގެން ދިއުމަކީ، ދިވެހީންނަށް އޮންލައިންކޮށް ވިޔަފާރިކުރުމަށާއި ބައިނަލްއަޤްވާމީ މާކެޓްޕްލޭސްތަކަށް ވާސިލުވުމަށް ހުޅުވިގެންދިޔަ ވަރަށް ބޮޑު ކުރިއެރުމެއްކަމަށް މޯލްޑިވްސް ޕޯސްޓް އޮފީހުން ފާހަގަކުރި އެވެ.