މޯލްޑިވްސް ޕޯސްޓްގެ ހިދުމަތްތައް ޒަމާނީކޮށް ފުޅާކުރުމަށް ކުރަމުންދާ މަސައްކަތުގެ ދަށުން، ކުޅުދުއްފުށީ ސިޓީގައި "ޕިކްޕޯސްޓް" ހިދުމަތް ރަސްމީކޮށް ފަށައިފިއެވެ. މިއީ މާލެ ސިޓީން ބޭރުގައި މި ހިދުމަތް ތަޢާރަފުކުރި ފުރަތަމަ ފަހަރެވެ.

މި ހިދުމަތާއެކު، ކުޅުދުއްފުށީ ސިޓީގައި ކުރިން ދެމުންދިޔަ ޕޯސްޓްގެ ހިދުމަތްތައް މިހާރު ވަނީ އެ ސިޓީގެ ބަންޑާރަމަގު، ސީނާ ބިލްޑިންގްގެ ފުރަތަމަ އަދި ދެވަނަ ފަންގިފިލާއަށް ބަދަލުކޮށްފައެވެ. މި އިމާރާތަކީ ޝަހީދު ކޯޕްރަލް ހުސައިން އާދަމްގެ ހަނދާނީ ބިނާ ކައިރީގައި ހުންނަ އިމާރާތެކެވެ. މި ބަދަލުގެ ސަބަބުން ކުޅުދުއްފުށީ ސިޓީގެ ރައްޔިތުންނަށް ޕޯސްޓްގެ ހިދުމަތްތައް ހޯދުމުގައި ބޮޑެތި ފަސޭހަތަކެއް ލިބި، ހިދުމަތުގެ ފެންވަރު އިތުރަށް ރަނގަޅުވެގެންދާނެއެވެ.

ޕިކްޕޯސްޓް ހިދުމަތުގެ އެންމެ ބޮޑު އެއް ފައިދާއަކީ، ޕާރުސަލް ނެގުމަށްޓަކައި ކިއުއެއްގައި މަޑުކުރަން ނުޖެހުމެވެ. މޯލްޑިވްސް ޕޯސްޓުން ފޮނުވާ މެސެޖުގައިވާ ވަގުތުގެ ތެރޭގައި، ކަސްޓަމަރަށް ފަސޭހަ ކޮންމެ ވަގުތެއްގައި އައިސް އަމިއްލައަށް ޕާރުސަލް ނެގުމުގެ ފުރުސަތު މި ނިޒާމުގެ ތެރެއިން ލިބިގެންދާނެއެވެ.

މި ހިދުމަތުގެ އިތުރުން، ކުރިއެކޭވެސް އެއްފަދައިން ރާއްޖޭގެ އެހެން ރަށްތަކަށާއި ރާއްޖެއިން ބޭރުގެ ގައުމުތަކަށް ޕޯސްޓް ފޮނުވުމުގެ ހިދުމަތްވެސް ކުޅުދުއްފުށީ ޕޯސްޓް އޮފީސް މެދުވެރިކޮށް ލިބޭނެއެވެ. އަދި ދިވެހި އުފެއްދުންތެރިންނަށް ހާއްސަ "ރަށު އޮންލައިން ފިހާރަ" ނުވަތަ "ކޮމިއުނިޓީ އޮންލައިން ޝޮޕް" މެދުވެރިކޮށް ތަކެތި ވިއްކާ ފަރާތްތަކަށް ބޭނުންވާ އެހީތެރިކަމާއި، އެ ތަކެތި ރާއްޖެއާއި ރާއްޖެއިން ބޭރުގެ ކަސްޓަމަރުންނަށް އިތުބާރާއެކު ރައްދުކޮށްދިނުމުގެ ހިދުމަތްވެސް ފޯރުކޮށްދޭނެއެވެ. މީގެ އިތުރުން "އީޓުކުރި ލޯކަލް" ޕްލެޓްފޯމް މެދުވެރިކޮށް ވިޔަފާރިކުރަން ބޭނުންވާ ފަރާތްތަކަށްވެސް އެ ޚިދުމަތްތައް މިހާރު ލިބިގެންދާނެއެވެ.

މޯލްޑިވްސް ޕޯސްޓުން ހާމަކުރި ގޮތުގައި، ޕޯސްޓްގެ އޮޕަރޭޝަނަލް އިންފްރާސްޓްރަކްޗަރ ހަރުދަނާކުރުމަށް ކުރެވޭ މިފަދަ މަސައްކަތްތަކުގެ ސަބަބުން، ރާއްޖޭގެ ވިޔަފާރި ފަހިކޮށްދޭ މުހިންމު ފަރާތެއްގެ ގޮތުގައި އެ ކުންފުނިން އަދާކުރާ ދައުރު އިތުރަށް ފުޅާވެގެންދާނެއެވެ. އަދި މިއީ ރައްޔިތުންނާ ވީހާވެސް ގާތުން ޒަމާނީ ހިދުމަތްތައް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.