ކުރިއަށްދާ ފީފާ ވޯލްކަޕް 2026 އާ ގުޅިގެން، މޯލްޑިވްސް ޕޯސްޓްގެ އެކްސްޕްރެސް މެއިލް ސަރވިސް (އީއެމްއެސް) އިން ހާއްސަ ޕްރޮމޯޝަނެއް ފަށައިފިއެވެ. 19 ޖުލައި 2026 ގެ ނިޔަލަށް ކުރިއަށްދާ މި ޕްރޮމޯޝަނުގެ ދަށުން، ރާއްޖެއިން ބޭރަށް ފޮނުވާ ކޮންމެ އީއެމްއެސް ޝިޕްމަންޓަކުން %26 ގެ ބޮޑު ޑިސްކައުންޓެއް ކަސްޓަމަރުންނަށް ލިބިގެންދާނެއެވެ.
އެކްސްޕްރެސް މެއިލް ސަރވިސް ނުވަތަ އީއެމްއެސް އަކީ ދުނިޔޭގެ އެކިކަންކޮޅުތަކަށް 3 ދުވަހާއި 5 ރަސްމީ ދުވަހުގެ ތެރޭގައި ތަކެތި ފޯރުކޮށްދޭ އަވަސް ހިދުމަތެކެވެ. މި ހިދުމަތް މެދުވެރިކޮށް ދުނިޔޭގެ 177 ގައުމަކަށް ތަކެތި ފޮނުވުމުގެ ފުރުސަތު އޮންނައިރު، މޯލްޑިވްސް ޕޯސްޓްގެ ކޮންމެ އައުޓްލެޓަކުންވެސް މި ހިދުމަތް ލިބިވަޑައިގަންނަވާނެއެވެ. އަދި ތަކެތި ފޮނުވުމުގެ ކުރިން، މޯލްޑިވްސް ޕޯސްޓްގެ ވެބްސައިޓުގައިވާ "ޕޯސްޓޭޖް ކަލްކިއުލޭޓަރ" މެދުވެރިކޮށް އަގުތައް ބަލާލުމުގެ ފުރުސަތުވެސް ކަސްޓަމަރުންނަށް ވަނީ ހުޅުވާލެވިފައެވެ.
ޑިސްކައުންޓް ޕްރޮމޯޝަންގެ އިތުރުން، ވޯލްކަޕަށް ފޯރި އިތުރުކުރުމުގެ ގޮތުން "ސްކޯ ޕްރިޑިކްޝަން" މުބާރާތެއްވެސް މޯލްޑިވްސް ޕޯސްޓުން ވަނީ ރާވާފައެވެ. މި މުބާރާތް ކުރިއަށްދާނީ އެ ކުންފުނީގެ ފޭސްބުކް އަދި އިންސްޓަގްރާމް ޕޭޖްތަކުގައެވެ. މުބާރާތުގައި ބައިވެރިވުމަށްޓަކައި، ކޮންމެ މެޗެއްގެވެސް ދެވަނަ ހާފު ފެށުމުގެ ކުރިން، އެ މެޗަކަށް ހާއްސަކޮށްފައިވާ ޕޯސްޓުގެ ކޮމެންޓް ސެކްޝަންގައި މެޗު ނިމޭނެ ކަމަށް ލަފާކުރާ ސްކޯ ޖަހަންޖެހޭނެއެވެ. ދެވަނަ ހާފު ފެށުމަށްފަހު ކުރާ ކޮމެންޓްތަކާއި، އެޑިޓްކޮށްފައިވާ ކޮމެންޓްތައް ބާތިލުވާނެ ކަމަށް މޯލްޑިވްސް ޕޯސްޓުން މައުލޫމާތުދެއެވެ.
Advertisement
މި މުބާރާތުން އެންމެ ގިނައިން ސްކޯ ދިމާކުރާ ފަރާތްތަކަށް އަގުހުރި އިނާމުތަކެއް ވަނީ ހުށަހެޅިފައެވެ. އެގޮތުން:
- ފުރަތަމަ ސްޓޭޖްގެ ނަސީބުވެރިޔާއަށް: ޕޯޗުގަލް ގައުމީ ޓީމުގެ ޖާރޒީއެއް.
- ދެވަނަ ސްޓޭޖްގެ ނަސީބުވެރިޔާއަށް: ފްރާންސް ގައުމީ ޓީމުގެ ޖާރޒީއެއް.
- މުޅި އިވެންޓްގެ ގްރޭންޑް ވިނަރއަށް: ފީފާ ވޯލްކަޕް ހިސްޓޮރީ ބޯލް ސެޓަކާއި، 20 ކިލޯގެ ތަކެތި ހިލޭ ފޮނުވޭނެ އީއެމްއެސް ވައުޗަރެއް.
މޯލްޑިވްސް ޕޯސްޓުން ބުނީ މި ޕްރޮމޯޝަނަކީ ކަސްޓަމަރުންނަށް ލުއިފަސޭހަ އަގުތަކެއްގައި ޚިދުމަތް ދިނުމަށާއި، ދުނިޔޭގެ އެންމެ ބޮޑު ކުޅިވަރު އީދާ ގުޅިގެން ކަސްޓަމަރުންނަށް އުފާވެރިކަން ގެނެސްދިނުމަށް ފެށި ހަރަކާތެއް ކަމަށެވެ.
