އީދު ފާހަގަކުރުމުގެ ގޮތުން ރާއްޖޭގެ އެކި ރަށްރަށުގައި ތަފާތު ހަރަކާތްތައް ކުރިއަށްދާއިރު، ހދ. ކުޅުދުއްފުށީގައި ބޭއްވި މަގުބޫލު "މާލި ޕެރޭޑް" ގައި ސަރުކާރުގެ އިސް ތަރުޖަމާނު މުހައްމަދު ޝަރީފް (މުންދު) އަށް އަމާޒުކޮށް ގިނަ "މީމް" ތަކެއް ވަނީ ދައްކާލައިފަ އެވެ.

ކުޅުދުއްފުއްޓަކީ ކޮންމެ އަހަރަކުވެސް އީދު ތެރޭގައި، އެއިރެއްގައި އޮންނަ ސަރުކާރަކަށް މަލާމާތާއި ފާޑުކިޔުން ރައްދުވާ ގޮތަށް ތަފާތު މީމްތައް ހަދައިގެން ޕެރޭޑު ބާއްވާ ރަށެކެވެ. މިފަހަރުގެ ޕެރޭޑުގައި ސަރުކާރުގެ އިސް ތަރުޖަމާނު މުންދު އަށް ނިސްބަތްކޮށް ގިނަ މީމްތަކެއް ތައްޔާރުކޮށްފައިވެ އެވެ.

މިކަމާ ގުޅިގެން މުންދު ކުރެއްވި ފޭސްބުކް ޕޯސްޓެއްގައި ކުޅުދުއްފުށީގެ މާލި ޕެރޭޑުގެ ވީޑިއޯއެއް ހިއްސާކުރައްވަމުން ވިދާޅުވީ، ކުޅުދުއްފުށީގެ މާލި ޕެރޭޑުގައި މީމްއެއްގެ ގޮތުގައި ނަމަވެސް ހިމެނުމަކީ އޭނާއަށް ލިބުނު "މެޑަލް" އެއް ކަމަށެވެ. އަދި އޭނާ ވަނީ އެއީ "Height of notoreity in Maldives" ނުވަތަ ނޭދެވޭ ކަމަކަށް ނަމަވެސް މަޝްހޫރުވުމުގެ އެންމެ މަތީ ދަރަޖަ ކަމަށް ސަމާސާ ރޫހެއްގައި ސިފަކުރައްވާފަ އެވެ.

މުންދު އަކީ ނޫސްވެރިންގެ ބައްދަލުވުންތަކުގައި ނޫސްވެރިން ކުރާ ސުވާލުތަކަށް ވަރަށް ފުރިހަމައަށް ޖަވާބުދެއްވާ، އަދި ރައްޔިތުން ގަޔާވާފަދަ ގޮތަކަށް ވާހަކަފުޅު ދައްކަވާ ތަރުޖަމާނެއްގެ ގޮތުގައި ފާހަގަކުރެވޭ ބޭފުޅެކެވެ. މީގެ އިތުރުން، އޭނާއަކީ ވަރަށް އެކުވެރި، މީހުންނާ ގުޅޭ އަދި ރުޅި އިސްނުކުރައްވާ ބޭފުޅެއްގެ ގޮތުގައިވެސް އާންމުންގެ މެދުގައި ފާހަގަކުރެވިފައިވެ އެވެ.

އީދުގެ އުފާފާޅުކުރުމުގެ ތެރެއިން އައި މި ފާޑުކިޔުންތަކަށް މުންދު ދެއްވި މި ހިތްހެޔޮ ޖަވާބަށް ގިނަ ބައެއްގެ ސަމާލުކަން ވަނީ ހުއްޓިފަ އެވެ.