ފިތުރު އީދު އަދި އަޟްހާ އީދަކީ ރަސްމީ ޗުއްޓީ ދުވަސްތަކެއްގެ ގޮތުގައި އެމެރިކާގެ ކެލިފޯނިއާ ސްޓޭޓުން ރަސްމީކޮށް ކަނޑައަޅައިފިއެވެ.
ކެލިފޯނިއާގެ ގަވަރުނަރުގެ އޮފީހުން ހާމަކޮށްފައިވާގޮތުގައި، އެ ސްޓޭޓްގެ ގާނޫނު ހަދާ މަޖިލީހުގެ މެންބަރު މެޓް ހޭނީ ހުށަހަޅުއްވައިގެން ފާސްކުރި "އެސެމްބްލީ ބިލް 2017" ގައި ގަވަރުނަރު ނިއުސަމް ސޮއިކުރެއްވީ ސެޕްޓެމްބަރު 27 ވަނަ ދުވަހުއެވެ.
މި އައު ގާނޫނުގެ ދަށުން، ކެލިފޯނިއާގެ ސަރުކާރު މުވައްޒަފުންނަށް މަސައްކަތު އުސޫލުތަކާއި އެއްބަސްވުންތަކާ އެއްގޮތްވާގޮތުގެ މަތިން، ޗުއްޓީ ކްރެޑިޓް ނުވަތަ ޕާސަނަލް ލީވް ބޭނުންކޮށްގެން އީދު ފާހަގަކުރުމުގެ ފުރުސަތު ލިބިގެންދާނެއެވެ.
Advertisement
މީގެއިތުރުން، އާންމު ސްކޫލްތަކާއި ކޮމިއުނިޓީ ކޮލެޖްތަކަށް އެ މުއައްސަސާތަކުގެ މެދުގައި ހެދޭ އެއްބަސްވުންތަކުގެ ދަށުން އީދު ދުވަހު ސްކޫލްތައް ބަންދުކުރުމުގެ އިހްތިޔާރު މި ގާނޫނުން ލިބިދެއެވެ.
މި ބިލަށް ކެލިފޯނިއާގެ މުސްލިމުންނަށް ވަކާލާތުކުރާ ޖަމިއްޔާތަކާއި ކޮމިޝަންތަކުން ވަރަށް ބޮޑަށް އެއްބާރުލުން ދީފައިވެއެވެ. އެގޮތުން، ކެއަރކެލިފޯނިއާ އާއި އޭޝިއަން އެންޑް ޕެސިފިކް އައިލެންޑަރ އެމެރިކަން އެފެއާޒް ކޮމިޝަންގެ އިތުރުން މުސްލިމް އިމްޕެކްޓް ކައުންސިލުން ވަނީ މި ނިންމުމަށް މަރުހަބާ ކިޔާފައެވެ. މިކަމުގެ ސަބަބުން އީދު ފާހަގަކުރުމަށް ބޭނުންވާ މުސްލިމް ދަރިވަރުންނާއި މުވައްޒަފުންނަށް ކުރިމަތިވާ ހުރަސްތައް ކުޑަވެގެންދާނެކަމަށް އެ ފަރާތްތަކުން ފާހަގަކޮށްފައިވެއެވެ.
2025 ވަނަ އަހަރު ވޮޝިންޓަން ސްޓޭޓުން ފިތުރު އީދު އަދި އަޟްހާ އީދު ރަސްމީ ޗުއްޓީ ދުވަސްތަކެއްގެ ގޮތުގައި ކަނޑައަޅާފައިވާއިރު، ކެލިފޯނިއާ ވެގެން ގޮސްފައިވަނީ މިފަދަ ނިންމުމެއް ނިންމި އެމެރިކާގެ ދެވަނަ ސްޓޭޓަށެވެ.
