ދުނިޔޭގެ ނިއުކްލިއާ ހަތިޔާރުގެ 90 އިންސައްތައަށްވުރެ ބޮޑު ބައެއް ކޮންޓްރޯލްކުރާ އެންމެ ބޮޑު ތިން ބާރު ކަމަށްވާ އެމެރިކާ، ޗައިނާ އަދި ރަޝިޔާގެ ވެރިން، ތާރީހުގައި ފުރަތަމަ ފަހަރަށް އެއް މޭޒެއްގެ ދޮށުގައި ބައްދަލުކުރައްވައިފިއެވެ. އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގެ ހަވާސާގައި އިއްޔެ ޗައިނާގެ ޝެންޒެންގެ 'ކައިލިން ވިލާ' ގައި ބޭއްވި މި ބައްދަލުވުން 80 އާއި 90 މިނެޓާ ދެމެދުގެ ވަގުތަކަށް ދެމިގެންދިޔައެވެ. އެމެރިކާގެ ރައީސް ޑޮނަލްޑް ޓްރަމްޕާއި، ޗައިނާގެ ރައީސް ޝީ ޖިންޕިންގް އަދި ރަޝިޔާގެ ރައީސް ވްލަޑިމިއާ ޕޫޓިން ބައިވެރިވެވަޑައިގެންނެވި މި ބައްދަލުވުން ޗައިނާއިން ސިފަކުރީ "ސުލްހައިގެ ސަމިޓެއް" ގެ ގޮތުގައެވެ. އަދި ބައްދަލުވުން ފައްޓަވަމުން ރައީސް ޓްރަމްޕް ވިދާޅުވީ، މި ބައްދަލުވުމާއެކު ތިން ލީޑަރުން މި ކުރައްވަނީ ތާރީހީ ކަމެއް ކަމަށެވެ.
މި ބައްދަލުވުމަކީ ދުނިޔޭގެ ސިޔާސީ މަސްރަހު ދިރާސާކުރާ ފަރާތްތަކުން 1945 ވަނަ އަހަރުގެ ފެބްރުއަރީ މަހު ބޭއްވި ތާރީހީ "ޔާލްޓާ ކޮންފަރެންސް" އާ އަޅާކިޔާ ބައްދަލުވުމެކެވެ. ދެވަނަ ބޮޑު ހަނގުރާމަ ނިމުމަކަށް އައި ދުވަސްވަރު، އޭރުގެ އެމެރިކާގެ ރައީސް ފްރޭންކްލިން ޑީ. ރޫޒްވެލްޓާއި، އިނގިރޭސި ބޮޑުވަޒީރު ވިންސްޓަން ޗާޗިލް އަދި ސޯވިއެޓް ޔޫނިއަންގެ ލީޑަރު ޖޯސެފް ސްޓާލިން ބޭއްވެވި ޔާލްޓާ ބައްދަލުވުމުގައި ވަނީ ދުނިޔޭގެ ބާރުތައް ބަހާލައި، އ.ދ އުފެއްދުމުގެ ބިންގާ އަޅާފައެވެ. ނަމަވެސް 1945 އާ ހިލާފަށް، މިއަދުގެ ބައްދަލުވުމުގައި އެމެރިކާއާއި ޗައިނާ އަދި ރަޝިޔާއަކީ އެއްބަޔަކު އަނެއްބަޔަކާ ވާދަވެރި ތިން ގައުމެވެ. 2022 ވަނަ އަހަރު ޗައިނާއާއި ރަޝިޔާއިން "އެއްވެސް ހުދޫދެއް ނެތް" ގުޅުމެއް ގާއިމުކޮށް، އޭގެ ކުޑަ ދުވަސްކޮޅެއް ފަހުން ރަޝިޔާއިން ޔޫކްރެއިނަށް އެރުމާ ގުޅިގެން ހުޅަނގުގެ ގައުމުތަކުން ރަޝިޔާ އެކަހެރިކޮށްފައި އޮތުމަށްފަހު، ޕޫޓިންއަށް މިފަދަ ބައްދަލުވުމަކުން ފުރުސަތު ލިބުމަކީ ރަޝިޔާއަށް ލިބުނު ޑިޕްލޮމެޓިކް ކާމިޔާބީއެއްގެ ގޮތުގައި ބެލެވެއެވެ.

ޔާލްޓާ ކޮންފަރެންސްގައި ބައިވެރިވެވަޑައިގެންނެވި "ބިގް ތްރީ" (ބޮޑު ތިން ބާރުގެ ވެރިން) ކަމަށްވާ ވިންސްޓަން ޗާޗިލް (ވ)، ފްރޭންކްލިން ރޫޒްވެލްޓް (މ) އަދި ޖޯސެފް ސްޓާލިން (ކ). އެ ބޭފުޅުންގެ ފަހަތުގައި ކޮޅަށް ތިއްބެވީ، (ވާތްފަރާތުން ފެށިގެން) ފީލްޑް މާޝަލް ސަރ އެލަން ބްރޫކް، ފްލީޓް އެޑްމިރަލް އާނެސްޓް ކިންގް، ފްލީޓް އެޑްމިރަލް ވިލިއަމް ޑީ. ލީހީ، ޖެނެރަލް އޮފް ދަ އާމީ ޖޯޖް މާޝަލް، މޭޖަރ ޖެނެރަލް ލޯރެންސް އެސް. ކުޓަރ، ޖެނެރަލް އެލެކްސީ އެންޓޮނޯވް، ވައިސް އެޑްމިރަލް ސްޓެޕާން ކުޗެރޯވް، އަދި އެޑްމިރަލް އޮފް ދަ ފްލީޓް ނިކޮލާއި ކުޒްނެޓްސޯވް. | އާންމުކޮށް ބޭނުންކުރާ ފޮޓޯއެއް
ތިން ގައުމުގެ މި ބައްދަލުވުމުގެ ކުރިން، ރައީސް ޓްރަމްޕް ވަނީ ރައީސް ޕޫޓިންއާ ވަކިން ބައްދަލުކުރައްވައި، އޭނާއަކީ "އެކުވެރިއެއް" ކަމަށް ވިދާޅުވެފައެވެ. އަދި ޗައިނާގެ ރައީސް ޝީ ޖިންޕިންގް ވަނީ 1959 ވަނަ އަހަރު މާއޯ ޒެޑޮންގް ބެއިޖިންގ އެއާޕޯޓުން ނިކީތާ ކްރުޝްޗޭވް އަށް މަރުހަބާ ވިދާޅުވި ފަހުން ފުރަތަމަ ފަހަރަށް، އަމިއްލަފުޅަށް އެއާޕޯޓަށް ވަޑައިގެން ޓްރަމްޕަށް ހޫނު މަރުހަބާއެއް ދަންނަވާފައެވެ. މި ބައްދަލުވުމަށްފަހު ނެރުނު ހަތަރު ނުކުތާގެ ގުޅިފައިވާ ބަޔާނުގައި، އ.ދ އިސްލާހުކުރުމަށާއި، ދުނިޔޭގެ ބާޒާރަށް ތެލުގެ ސަޕްލައި އިތުރުކުރުމުގެ އިތުރުން، ބައިނަލްއަގުވާމީ ޖިނާއީ ކޯޓު (އައި.ސީ.ސީ) ގެ ބާރު ނަހަމަ ގޮތުގައި ބޭނުންކުރުން ހުއްޓުވުމަށް ތިން ލީޑަރުން އެއްބަސްވެވަޑައިގެންނެވިއެވެ. މީގެ އިތުރުން، މި އަހަރުގެ ފެބްރުއަރީ މަހު މުއްދަތު ހަމަވެފައިވާ "ނިއު ސްޓާޓް" ނިއުކްލިއާ މުއާހަދާގެ ބަދަލުގައި، ނިއުކްލިއާ ހަނގުރާމައިގެ ނުރައްކާ ކުޑަކުރުމަށް މަޝްވަރާތައް ކުރިއަށް ގެންދިއުމަށްވެސް އެއްބަސްވިއެވެ.
މި ތާރީހީ ސަމިޓުގައި ޔޫކްރެއިން ހަނގުރާމައާއި ނިއުކްލިއާ ހަތިޔާރު މަދުކުރުމާ ގުޅޭގޮތުން ވާހަކަދެކެވުނު ނަމަވެސް، ބޮޑެތި މައްސަލަތަކަށް ސީދާ އަމަލީ ހައްލެއް ލިބިފައެއް ނުވެއެވެ۔ ހާއްސަކޮށް ޗައިނާއިން އެ ގައުމުގެ ނިއުކްލިއާ ހަތިޔާރު މަދުކުރުމުގެ އެއްބަސްވުމެއްގައި ބައިވެރިވުމަކަށް އެއްބަހެއް ނުވިއެވެ. އަދި 1945 ގެ ޔާލްޓާ ކޮންފަރެންސް ފަދައިން، ބޮޑެތި ބާރުތަކުން ގުޅިގެން ޔޫކްރެއިންގެ ބައިވެރިވުމެއް ނެތި އެ ގައުމުގެ މުސްތަގުބަލާ މެދު ނިންމުންތަކެއް ނިންމަފާނެތީ ޔޫކްރެއިނުން ވަނީ ކަންބޮޑުވުން ފާޅުކޮށްފައެވެ۔ ބައްދަލުވުން ނިންމަވާލެއްވުމަށްފަހު ރައީސް ޓްރަމްޕް އެމެރިކާއަށް ފުރާވަޑައިގެންނެވިއިރު، ރައީސް ޕޫޓިން ވަނީ ކްރައިމިއާ ބްރިޖަށް ޔޫކްރެއިނުން ދޭ ހަމަލާތަކަށް ވަރަށް ވޭންދެނިވި ރައްދެއް ދޭނެ ކަމުގެ އިންޒާރު ދެއްވާފައެވެ.
ބައިނަލްއަގުވާމީ މީޑިއާތަކުގައި މި ބައްދަލުވުމަށް ބޮޑު ސަމާލުކަމެއް ލިބުނު ނަމަވެސް، އެމެރިކާގެ އެތެރޭގެ ސިޔާސީ މަސްރަހުގައި ރައީސް ޓްރަމްޕަށް ވަނީ ވަރުގަދަ ފާޑުކިޔުންތަކެއް އަމާޒުވެފައެވެ. އެމެރިކާގެ ސެނެޓްގެ މައިނޯރިޓީ ލީޑަރު ޗަކް ޝޫމާ ފަދަ ބޭފުޅުންނާއި ހުޅަނގުގެ ބައެއް ސިޔާސީ މާހިރުން ވިދާޅުވީ، އެމެރިކާގެ އެންމެ ބޮޑު ދެ ވާދަވެރިން ކަމަށްވާ ޕޫޓިންއާއި ޝީ ޖިންޕިންގްއާއެކު ޓްރަމްޕް މި ބޭއްވެވި ބައްދަލުވުމަކީ އެމެރިކާގެ އުސޫލުތަކަށް ވީ ބޮޑު ޚިޔާނާތެއް ކަމަށެވެ. އެހެންނަމަވެސް ޓްރަމްޕް ވަނީ މި ދަތުރުފުޅަކީ ވަރަށް ކާމިޔާބު އަދި މުހިންމު ދަތުރުފުޅެއް ކަމަށް ވިދާޅުވެފައެވެ.



