ދުނިޔޭގެ ހަކަތައިގެ ބާޒާރު ހަމަޖައްސައި، ތެލުގެ އަގުތައް އުފުލެމުންދާ ދިއުމަށް ހައްލެއް ގެނައުމަށްޓަކައި ސާފުކުރި ތެޔޮ އުފައްދާ މިންވަރާއި ސަޕްލައި އިތުރުކުރުމަށް އެމެރިކާ، ޗައިނާ އަދި ރަޝިޔާއިން އެއްބަސްވެއްޖެއެވެ. ޗައިނާގެ ޝެންޒެންގައި ބޭއްވި ތިން ގައުމުގެ ސަމިޓަށްފަހު އާންމުކުރި ބަޔާނުގައި ބުނެފައިވަނީ، ހުރިހާ ގައުމުތަކެއްގެ ލާބައާއި މަންފާއަށްޓަކައި ތެލުގެ ބާވަތްތައް އުފެއްދުން އިތުރުކޮށް، މެދުނުކެނޑި ހަކަތަ ލިބޭނެ އިންތިޒާމު ހަމަޖެއްސުމަށް ތިން ގައުމުން މަސައްކަތްކުރާނެ ކަމަށެވެ.
މި ސަމިޓުގައި ވާހަކަދައްކަވަމުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ވަރަށް ގިނަ ވިޔަފާރީގެ އެއްބަސްވުންތަކެއްގައި ވަރަށް އަވަހަށް ސޮއިކުރެވޭނެ ކަމަށެވެ. އަދި ޗައިނާގެ ރައީސް ޝީ ޖިންޕިންގް ވަނީ އޭޕެކް ގެ ގައުމުތަކުން މިނިވަން ވިޔަފާރި ދިފާއުކުރުމަށް ގޮވާލައްވައި، ސަރަހައްދީ އިގްތިސާދީ އެއްބާރުލުމަށް ޗައިނާއިން 20 މިލިއަން ޑޮލަރު ދެއްވާނެކަން އިއުލާންކުރައްވާފައެވެ.
މި އެއްބަސްވުމަށް އާދެވިފައި މިވަނީ ހުރްމުޒް ކަނޑުއޮޅީގައި ތެޔޮ ބޯޓުތަކަށް ދެމުންދާ ހަމަލާތަކާ ގުޅިގެން ދުނިޔޭގެ ތެލުގެ ސަޕްލައިއަށް ނުތަނަވަސްކަން ވެރިވެފައިވާ ދަނޑިވަޅެއްގައެވެ.


