ރާއްޖޭގައި ޓެރަރިޒަމާއި ދެކޮޅަށް މަސައްކަތް ކުރާ ގައުމީ މުއައްސަސާއާއެކު "އަމާން އައްސޭރި" ގެ ނަމުގައި ކުރިއަށްގެންދިޔަ ގައުމީ ހަރަކާތް ނިންމާލައިފިއެވެ.
މި ހަރަކާތަކީ ރައީސް އޮފީހާއި ރާއްޖޭގައި ހުންނަ އިނގިރޭސިވިލާތުގެ ހައި ކޮމިޝަން ޓޭބަލްޓޮޕް އެކްސަސައިޒެއްގެ ގޮތުގައި ދެދުވަހުގެ މުއްދަތަށް ކުރިއަށްގެންދިޔަ ހަރަކާތެކެވެ.
ކްރޮސްރޯޑްސްގައި ކުރިއަށް ގެންދިޔަ މި ހަރަކާތުގައި ނެޝަނަލް ޓެރަރިޒަމް ރެސްޕޮންސް ޕްލޭން ވަނީ ޓެސްޓުކޮށްފައެވެ.
ޓެރަރިޒަމާއި ގުޅުންހުރި ކުއްލި ނުރައްކާތަކާއި ކުރިމަތިލާން ތައްޔާރުވެވިފައިވާ މިންވަރާއި، އެފަދަ ހާލަތެއްގައި މުއައްސަސާތަކުގެ މެދުގައި އެއްބާރުލުންދެވޭ މިންވަރު ދެނެގަނެ، ގާބިލްކަން ހުރި ނެތް މިންވަރާއި، އެކަންކަން ހަރުދަނާ ކުރަން ނިންމަންޖެހޭ ނިންމުންތައް ދެނެގަތުމަށް މި ހަރަކާތުގައި ވަނީ މަޝްވަރާ ކޮށްފައެވެ.
މި ހަރަކާތުގެ އަމާޒަކީ ރާއްޖޭގެ މިނިވަންކަމާއި އިސްތިގުލާލު ދަމަހައްޓައި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރުން ގެންގުޅޭ ސިޔާސަތުތަކަށް އަމަލީ ސިފަ ގެނެސް، ގައުމީ ސަލާމަތަށް ސަރުކާރުން ކުރާ މަސައްކަތް ހަރުދަނާކުރުމެވެ.
ސަރުކާރުގެ 11 ވުޒާރާއެއް ތަމްސީލުކުރައްވާ އިސްވެރިންނާއި މަންދޫބުން ވަނީ މި ހަރަކާތުގައި ބައިވެރިވެވަޑައިގެންފައެވެ. އެ ފަރާތްތަކުން ވަނީ އިސްތިރާޖީ ފެންވަރުގެ މަޝްވަރާތައް ކުރައްވައި، އަމަލީ ނަތީޖާ ނެރެވޭ ފަދަ ހުށަހެޅުންތަކެއް ހުށަހަޅުއްވާފައެވެ.
