ބ. އޭދަފުށީގައި ފަތާ ސަރަހައްދެއް ހަދަން އެ ރަށުން ކައުންސިލުން އެ މަސައްކަތް އެމްޓީސީސީއާ ހަވާލުކޮށްފި އެވެ.
މިކަމަށްޓަކައި އިއްޔެ ބޭއްވި ރަސްމިއްޔާތުގައި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަހުމަދު ސައުދީ އެވެ. އަދި އޭދަފުށި ކައުންސިލުގެ ފަރާތުން ސޮއިކުރެއްވީ ކައުންސިލުގެ ރައީސް މުހައްމަދު ފާތިހެވެ.
އެ މަޝްރޫއުގެ ދަށުން އޭދަފުށީގެ ދެކުނު ފަރާތުގައި މޫދަށް އެރުމަށް ވަކި ހާއްސަ ސަރަހައްދެއް ހަދަން ވަނީ ނިންމައިފަ އެވެ.
ބ. އޭދަފުށީގައި ފަތާ ސަރަހައްދެއް ހަދަން އެ ރަށުން ކައުންސިލުން އެ މަސައްކަތް އެމްޓީސީސީއާ ހަވާލުކުރުން
ފަތާ ސަރަހައްދު ހެދުމަށް އެ ރަށު ފަޅުތެރެއިން 15,914 ކިއުބިކް މީޓަރުގެ ސަރަހައްދެއް ފުންކޮށް, 160 މީޓަރުގެ ސަރަހައްދެއްގައި ޖިއޯބޭގް ރިވެޓްމަންޓް ޖެހުމަށް ވަނީ ނިންމައިފަ އެވެ. އަދި 60 މީޓަރުގެ ބޮޑުހިލައިގެ ބޭރުތޮއްޓެއް ޖަހައި، 70 މީޓަރުގެ ގްރޮއިން ޖެހުމަށް ވެސް ނިންމާފައިވެ އެވެ.
އޭދަފުށީގެ ރައްޔިތުން މިހާރު މޫދަށް އެރެން ބޭނުންކުރަނީ އެ ރަށުގެ އުތުރުފަރާތު ޕާކު ކުރިމަތީގައި އޮންނަ ސަރަހައްދެވެ. ނަމަވެސް އެ ރަށުގައި މޫދަށް އެރޭނެ ރަނގަޅު ސަރަހައްދެއް ނެތުމުން އާންމުންގެ ޝަކުވާ ގިނަ އެވެ.
