ތެލަސީމިއާ ސެންޓަރާއި މޯލްޑިވިއަން ބްލަޑް ސަރވިސަސްގެ ޚިދުމަތް މާލެ ސިޓީ ގްރޫޕް އޮފް ހޮސްޕިޓަލްސްގެ ދަށަށް ބަދަލުވުމާއެކު ތެލަސީމިއާ ހުންނަ ފަރާތްތަކަށް ސްޕެޝަލިސްޓް ޑޮކްޓަރުންނަށް ފަސޭހަކަމާއެކު ދެއްކުމުގެ އިންތިޒާމުތައް މިހާރު ހަމަޖެހިފައިވާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާގު ޙަލީމް ވިދާޅުވެއްޖެއެވެ.
ދައުލަތުގެ މީޑިއާ ޕްރޮގްރާމުގައި ވާހަކަދައްކަވަމުން އިބްރާހިމް ޢަބްދުއްރައްޒާގު ޙަލީމް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރާ އެއްގޮތަށް ތެލަސީމިއާ ޚިދުމަތް އިތުރަށް ތަރައްގީ ކުރުމަށް މަސައްކަތް ކުރައްވަމުންދާ ކަމަށެވެ. މިގޮތުން، ލޭގެ އެކި ބަލިތައް ހުންނަ ފަރާތްތަކަށްދޭ ފަރުވާގެ ނިޒާމު ހަރުދަނާކޮށް، ރާއްޖޭގައި ތެލަސީމިއާ ބައްޔަށް ހޭލުންތެރިކުރުމަށް މަސައްކަތް ކުރައްވާނެ ކަމަށް އިބްރާހިމް ޢަބްދުއްރައްޒާގު ޙަލީމް ވިދާޅުވިއެވެ.
ތެލަސީމިއާ ސެންޓަރު އޮރެންޖު ހިޔާއަށް ބަދަލުކުރުމުގެ ސަބަބުން ތެލަސީމިއާ ހުންނަ ފަރާތްތަކަށް ގިނަ ލުއިތަކެއް ލިބިގެން ގޮސްފައިވާ ކަމަށް އިބްރާހިމް ޢަބްދުއްރައްޒާގު ޙަލީމް ފާހަގަކުރެއްވިއެވެ. އަދި ތެލަސީމިއާ ހުންނަ ފަރާތްތަކަށް ލޭ ހަދިޔާ ކުރަން ބޭނުންވާ ފަރާތްތަކަށް އައިޖީއެމް ހޮސްޕިޓަލުގައިވެސް ފަސޭހައިން ލޭ ހަދިޔާ ކުރެވޭނެ އިންތިޒާމުތައް މިހާރު ހަމަޖެހިފައިވާ ކަމަށް އިބްރާހިމް ޢަބްދުއްރައްޒާގު ޙަލީމް ވިދާޅުވާޅުވިއެވެ.
"ހަމައެކަނި ތެލަސީމިއާގެ އިތުރުން ވަރަށް ގިނަ އެހެން ކަންކަމަށް އެބޭފުޅުން ކޮންސަލްޓް ކުރަން ބޭނުންވާނެ. ކަށީގެ ކަންކަން އެބަހުރި ހަމައެގޮތަށް އިންޓަރނަލް މެޑިސިންގެ ކަންކަން އެބަހުރި. އެހެންވީމަ އެކަންކަމަށް އެ ބޭފުޅުންނަށް ބޭނުންވާ ކަންކަން ފަހިކޮށްދެއްވުމަށްޓަކައި ސްޕެޝަލިސްޓް ކޮންސަލްޓޭޝަން އަޅުގަނޑުމެން ހުޅުމާލެ ހޮސްޕިޓަލުންނާއި އައިޖީއެމްއެޗުން ފަސޭހަކަމާއެކު އެޕޮއިންޓްމަންޓް ލިބޭނެގޮތް އަޅުގަނޑުމެން ހަމަޖައްސައިދީފިން،" އިބްރާހިމް ޢަބްދުއްރައްޒާގު ޙަލީމް ވިދާޅުވިއެވެ.
މާލޭގެ އިތުރުން ރަށްރަށުގައި ތިބި ތެލަސީމިއާ ހުންނަ ފަރާތްތަކަށް ޚިދުމަތް ދިނުމަށް އަތޮޅު ހޮސްޕިޓަލްތަކާއި ގުޅިގެން މަސައްކަތް ކުރައްވަމުންދާ ކަމަށްވެސް އިބްރާހިމް ޢަބްދުއްރައްޒާގު ޙަލީމް ވިދާޅުވިއެވެ.
މީގެ އިތުރުން، ބޯންމެރޯ ޓްރާންސްޕްލާންޓް ހައްދާ ފަރާތްތަކަށް ބޭނުންވާ ޓެސްޓުތައް ހެދުމުގެ ޚިދުމަތް ފަށައި، ހީމަޓޮލޮޖިސްޓެއްގެ ޚިދުމަތްވެސް ތެލަސީމިއާ ހުންނަ ފަރާތްތަކަށް ވަރަށް އަވަހަށް ހަމަޖެހިގެންދާނެ ކަމަށް އިބްރާހިމް ޢަބްދުއްރައްޒާގު ޙަލީމް އިތުރަށް ވިދާޅުވިއެވެ.
ތެލަސީމިއާ އާއިލާތަކުގެ ކަންބޮޑުވުންތަކަށް ހައްލު ހޯދައިދެއްވުމަށް މަސައްކަތް ކުރައްވަމުންދާކަން ފާހަގަކުރައްވައި، އިބްރާހިމް ޢަބްދުއްރައްޒާގު ޙަލީމް ވިދާޅުވީ މި އައު އިންތިޒާމުތަކުގެ ސަބަބުން ތެލަސީމިއާ ހުންނަ ފަރާތްތަކަށް ފަރުވާ ހޯދުމުގައި ދިމާވާ ގިނަ ދަތިތަކަށް ހައްލު ލިބިގެންދާނެ ކަމަށެވެ.
