ކޮންމެ އަހަރެއްގެ މެއި މަހުގެ 8 ވަނަ ދުވަހަކީ ބައިނަލްއަޤުވާމީ ގޮތުން ފާހަގަކުރާ ދުނިޔޭގެ ތެލެސީމިއާ ދުވަހެވެ. މި ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި މެސެޖެއްގައި، ތެލެސީމިއާ ދުވަހަކީ އިންސާނިއްޔަތުކަމާއި އޯގާތެރިކަމުގެ ސިފަތައް އިސްކުރުމަށް އަޅުގަނޑުމެންނަށް ހަނދާންކޮށްދޭ ދުވަހެއްގެ ގޮތުގައި ވަނީ ސިފަކުރައްވާފައެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ކޮންމެ ދިވެހި ދަރިއަކާއި ޢާއިލާއަކަށްމެ މުޖުތަމަޢުގެ އެހީތެރިކަމާއި އެއްބާރުލުންދީ، ބަދަހި ޤައުމެއް ބިނާކުރުމަކީ މުހިންމު ކަމެއް ކަމަށެވެ. އަދި ތެލެސީމިއާ ތަޙައްމަލުކުރަމުންދާ ކޮންމެ ދިވެއްސަކީވެސް އަޅުގަނޑުމެންގެ އަމިއްލަ ދަރިންނާއި ޢާއިލީ މެންބަރުންގެ ގޮތުގައި ދެކެންޖެހޭނެ ކަމަށް އެމަނިކުފާނު ފާހަގަކުރެއްވިއެވެ.
މީގެ އިތުރުން، ތެލެސީމިއާ ކުދިންނާއި އެ ކުދިންގެ ޢާއިލާތަކަށް ބޭނުންވާނެ ޞިއްޙީ އަދި އިޖުތިމާޢީ ރައްކާތެރިކަމާއި ފުރުޞަތުތައް ފަހިކޮށްދިނުމަކީ ސަރުކާރުގެ ބޮޑު ޒިންމާއެއް އަދި މަސްއޫލިއްޔަތެއް ކަމުގައިވެސް ރައީސް ވިދާޅުވިއެވެ.
ތެލެސީމިއާ އަކީ މައިންބަފައިންގެ ފަރާތުން ދަރިންނަށް ޖީންގެ ޒަރީޢާއިން ވާރުތަވާ ބައްޔެކެވެ. މައިންބަފައިންނަކީ ތެލެސީމިއާ ކެރިއަރުން ނުވަތަ ބަލީގެ ނިޝާން ހުރި މީހުން ކަމުގައިވާނަމަ، އެ މީހުންނަށް ލިބޭ ކުދިންނަށް މި ބަލީގެ ނުރައްކާތެރި ބާވަތް (ތެލެސީމިއާ މޭޖަރ) ޖެހުމުގެ ފުރުޞަތު އޮވެއެވެ.
މިއަހަރުގެ ދުނިޔޭގެ ތެލެސީމިއާ ދުވަހަށް ކަނޑައަޅާފައިވާ ޝިއާރަކީ "އިތުރަށް ފޮރުވިފައި ނުބޭތިއްބުން: ބަލި ހުރިކަން ނޭނގޭ މީހުން ހޯދުން. އެހީތެރިކަން ނުލިބޭ ފަރާތްތަކަށް އެހީވުން" މިއެވެ. މި ޝިއާރުގެ މައިގަނޑު މަޤްޞަދަކީ ބަލި ހުރިކަން ނޭނގި ތިބި މީހުން ދެނެގަތުމާއި، ފަރުވާގެ ކަންކަމުގައި ހުރި ހުރަސްތައް ނައްތާލައި، މުޖުތަމަޢުގައި އަޅާނުލެވި ތިބި ބަލިމީހުންނަށް ދޭ އެހީތެރިކަން އިތުރަށް ވަރުގަދަކުރުމެވެ.
ތެލެސީމިއާ ކުދިންނަށް ބޭނުންވާ ފަރުވާގެ ނިޒާމު ހަރުދަނާކުރުމަށް ސަރުކާރުން މިހާރުވެސް ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، ހިލޭ ބޯންމެރޯ ޓްރާންސްޕްލާންޓް ހެދުމުގެ ފުރުޞަތުތައް ފަހިކޮށްދިނުމާއި، ބޭނުންވާ ބޭހާއި ވަސީލަތްތައް ފަސޭހައިން ލިބޭނެ އިންތިޒާމުތައް ހަމަޖެއްސުން ހިމެނެއެވެ.
