ކޭޑީ އެންޓަރޕްރައިސަސްއަށް ހއ. ހުވަހަންދޫ ދަނޑުވެރިކަމަށް ދީފައެއް ނުވާނެ ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން މިއަދު ވިދާޅުވެއްޖެއެވެ. އެ ވުޒާރާއިން މިއަދު ނެރުނު ނޫސްބަޔާނެއްގައި ވިދާޅުވީ ދުވަހު ނޫހެއްގައި ޝާއިއު ކޮށްފައިވާ ޚަބަރެއްގައި ހަގީގަތާއި ހިލާފު ގިނަ މައުލޫމާތުތައް ހިމެނޭތީ އެކަމާއިމެދު ކަންބޮޑުވާކަމަށެވެ.

ވުޒާރާއިން ވިދާޅުވީ ކޭޑީ އެންޓަރޕްރައިސަސް ޕްރައިވެޓް ލިމިޓެޑް އަށް "އިންޓަރގްރޭޓެޑް އެގްރިކަލްޗަރ ޑިވެލޮޕްމަންޓް ޕްރޮޖެކްޓް" ގެ ނަމުގައި ދަނޑުވެރިކަން ހިންގަން ހުވަހަންދޫ ދޫކުރި އެއްބަސްވުމުގައި ސޮއިކޮށް ރަށް ހަވާލު ކޮށްދެއްވީ ދަނޑުވެރި ކަމާ ދިރޭތަކެއްޗާ ބެހޭ ވަޒީރު ޑރ. މަރިޔަމް މާރިޔާ ކަމަށް ބުނެފައިވާ ޚަބަރަކީ ސައްހަ ނޫން ޚަބަރެއް ކަމަށެވެ. އެ ރަށް ހަވާލުނުކުރާ ކަމަށާއި އެފަދަ އެއްވެސް އެއްބަސްވުމެއްގައި ވަޒީރު ސޮއިކޮށްފައި ނުވާނެ ކަމަށް ވުޒާރާއިން ފާހަގަކުރިއެވެ.

މީގެއިތުރުން، ވުޒާރާއިން ބުނީ ދަނޑުވެރިކަމަށް ރާއްޖޭގެ އެއްވެސް ރަށެއް މިހާތަނަށް ދޫކޮށްފައި ނުވާނެ ކަމަށެވެ. އަދި ހުވަހަންދޫއަކީ ވަގުތީގޮތުން އެ ރަށް ބެލެހެއްޓުމަށް ހއ. އަތޮޅު ކައުންސިލާއި ވުޒާރާއިން ހަވާލުކޮށްފައިވާ ރަށެއް ކަމަށް ވެސް ވުޒާރާއިން ބުންޏެވެ.

ވުޒާރާއިން އިތުރަށް ބުނީ ރަށްތައް ދޫކުރާނީ ވަކި އުސޫލަކާއި ގަވާއިދެއްގެ ދަށުން ކަމުން އެފަދަ ނިންމުމެއް ނިންމާނަމަ އުސޫލާއި ހިލާފު އެއްވެސް ކަމެއް ނުކުރާނެ ކަމަށެވެ.

އެގޮތުން، ޚަބަރުގައި ބުނެފައިވާ ފޮޓޯއަކީ ދިއްދޫ ދާއިރާގެ މެމްބަރު އަބްދުއް ލަތީފު މުހައްމަދު އެދިވަޑައިގެން ދެއްވި ފުރުސަތެއްގައި ބައްދަލުވެވަޑައިގެން ވަޒީރާއެކު ނެންގެވި ފޮޓޯއެއް ކަމަށްވެސް ވުޒާރާއިން ހާމަކުރިއެެވެ.

އެ ރަށް ކުރިން ކުއްޔަށް ނަގައިގެން އުޅޭ ފަރާތުގެ އަތުން ދިއްދޫ ކައުންސިލުން އެރަށް އަތުލީ އެގްރީމެންޓާއި ޚިލާފަށް ކަމަށް އެރަށް މީގެ ކުރިން ކުއްޔަށް ނެގި ފަރާތުން ބުނެއެވެ. ޚުލާސާ އަށް ވަނީ އެގްރީމެންޓުގެ ކޮޕީތައް ލިބިފައެވެ.