ރާއްޖޭގެ ދަނޑުވެރިންނަށް ހާއްސަޚޮށްގެން މާލެ ނޯތު ހާބަރުގައި ހަދަމުން އަންނަ ވަގުތީ މާރުކޭޓް މި ހަފްތާ އަންގާރަ ދުވަހު ހުޅުވަން ނިންމައިފި އެވެ.
އެގްރިކަލްޗާ މިނިސްޓްރީން މިއަދު ބުނެފައި ވަނީ، ވަގުތީ މާރުކޭޓު ހުޅުވަން ނިންމީ، ދަނޑުވެރިން އުފައްދާ ތަކެތި ރޯދަ މަހު ފަސޭހައިން ލިބޭނެ އިންތިޒާމެއް ހަމަޖެއްސުމަށް ކަމަށެވެ. އަދި އެ ވަގުތީ މާރުކޭޓު ހުންނާނީ މާލެ ނޯތު ހާބަރު ކެފޭ ހިންގި ތަނުގައި ކަމަށެވެ. އަންނަ ރަމަޟާން މަހު އެ މާރުކޭޓުން، ރާއްޖޭގެ ހަތް ރަށެއްގެ ދަނޑުތަކުން އުފައްދާ ތަކެތި ލިބޭނެ ކަމަށް އެމިނިސްޓްރީން ވަނީ ބުނެފައި އެވެ.
އެގްރިކަލްޗާ މިނިސްޓްރީން މިކަމާއި ބެހޭ ގޮތުން އިތުރަށް މައުލޫމާތު ދެމުން ބުނެފައި ވަނީ، އެ މާރުކޭޓުން، މޯލްޑިވްސް ގުޑް އެގްރިކަލްޗަރަލް ޕްރެކްޓިސެސް ނުވަތަ އެމްގެޕް ސެޓިފައިޑް ކޮށްފައިވާ ދިހަ ދަނޑެއްގެ އުފެއްދުންތައް ލިބޭނެ ކަމަށެވެ. އަދި އެ މާރުކޭޓުގައި އުފައްދާ ތަކެއްޗަކީ ކެމިކަލް ބޭނުންނުކޮށް ހައްދާފައިވާ ތަކެއްޗެވެ.
Advertisement
ރޯދަމަހަށް ހާއްސަ ދަނޑުވެރިންގެ މާރުކޭޓު ހުޅުވަން ނިންމާފައި ވަނީ އަންނަ އަންގާރަ ދުވަހު އެވެ. މިނިސްޓްރީން ބުނި ގޮތުގައި އެ މާރުކޭޓުގައި ވިއްކާނީ ރާއްޖޭގެ ދަނޑުތަކުގައި އުފައްދާ ތަކެތި އެކަންޏެވެ. އަދި އެއްވެސް އިމްޕޯޓް ތަކެއްޗެއް އެތަނުން ނުލިބޭނެ ކަމަށެވެ. އޭގެ އިތުރުން އެ މާރުކޭޓުގައި ތަކެތި ވިއްކަން ތިބޭނީ ހަމައެކަނި، ދިވެހިން ކަމަށް ވެސް ބުންޏެވެ.
ރާއްޖޭގެ ހަތް ރަށަކުން ދިވެހި ދަނޑުވެރިން ހައްދާ ތަކެތި ލިބޭ އިރު، މިރަށްތަކުގެ ތެރޭގައި މީހުން ދިރިއުޅޭ ރަށްތަކާއި ފަޅުރަށްތައް ވެސް ހިމެނެ އެވެ. އެގޮތުން މިނިސްޓްރީން މައުލޫމާތު ދިން ގޮތުގައި، މީހުން ދިރިއުޅޭ ރަށްރަށުގެ ތެރޭއިން ބައިވެރިވި ބައެއް ރަށްތަކަކީ ތ. ކަނޑޫދޫ، ގއ. ނިލަންދޫ އަދި ށ. ގޮއިދޫ އެވެ. އޭގެ ތެރެއިން ށ. ގޮއިދޫގެ 10 ދަނޑެއްގައި ހައްދާ ތަކެތި އެ މާރުކޭޓުގައި ވިއްކާން ހުންނާނެ އެވެ.
ރަމަޟާން މަހަށް ހުޅުވާ ވަގުތީ މަރުކޭޓާ ބެހޭ ގޮތުން މައޫލޫމާތު ހިއްސާކުރައްވަވަމުން މިނިސްޓްރީގެ ބޭފުޅަކު ވިދާޅުވީ "މި މާރުކޭޓު ހުޅުވަން ނިންމީ ގިނަ ރަށްރަށުގެ ދަނޑުވެރިންގެ ޝަކުވާތައް ލިބެމުން އަންނާތީ، ދަނޑުވެރިން ވިއްކާ އަގަށް ވުރެ ބޮޑުކޮށް ތަކެތި ބާޒާރުގައި ވިއްކަނީ، ދަނޑުވެރިންނަށް އެކަމުގެ ސަބަބުން ބޮޑު ގެއްލުމެއް ލިބޭ، އެހެންކަމުން ދަނޑުވެރިން އަމިއްލައަށް އައިސް މިފަހަރު ތަކެތި ވިއްކުމުގެ ފުރުސަތު ހޯދާމިދިނީ"
އޭގެ އިތުރަށް އެގްރިކަލްޗާ މިނިސްޓްރީން ބުނެފައި ވަނީ އެމާރުކޭޓުގައި ތަކެތި ވިއްކަން ތިބެނީ ދިވެހިންކަން، ޔަގީންކުރުމުގެ ގޮތުން އެމިނިސްޓްރީން ވަނީ ތަކެތި ވިއްކަން ތިބޭ ފަރާތްތަކުގެ މައުލޫމާތު މިނިސްޓްރީއާ ހިއްސާކުރަން، ރަށްރަށުގެ ކައުސިލްތަކަށާއި ކުންފުނިތަކަށް އަންގާފަ ކަމަށެވެ.
މި މަހު 17 ގައި ހުޅުވާ ދަނޑުވެރިންގެ މާރުކޭޓުގެ ހިދުމަތް ނޯތު ހާބަރު ކެފޭ ހުރި ތަނުން، ރޯދަމަހުގެ ނިޔަލަށް ލިބޭނެ ކަމަށް އެގްރިކަލްޗާ މިނިސްޓްރީން ބުންޏެވެ.
