ޣައްޒާއަށް އެހީގެ ޓްރަކުތައް ވަދެމުންދާއިރުވެސް، އިސްރާއީލު ޒަޔަނިސްޓުންގެ ޙަމަލާތަކުން އިތުރު 79 މީހުން ޣައްޒާއިން ޝަހީދުކޮށްލައިފިއެވެ. ޣައްޒާގެ ޞިއްޙަތާބެހޭ މިނިސްޓްރީން މަޢުލޫމާތު ދީފައިވާ ގޮތުގައި ވޭތުވެދިޔަ 24 ގަޑިއިރު ތެރޭގައި 163 މީހުން ޒަޚަމްވެފައިވެއެވެ.

ޔޫ.އެން އިން ބުނެފައިވާ ގޮތުގައި ވޭތުވެދިޔަ 24 ގަޑިއިރު ތެރޭގައި ގާތްގަނޑަކަށް 170 އެހީގެ ޓްރަކު ޣައްޒާއަށް ވަދެފައިވެއެވެ. ނަމަވެސް މިއީ ޣައްޒާގެ ރައްޔިތުންގެ ބޭނުންތައް ފުއްދުމަށް އެކަށީގެންވާ މިންވަރެއް ނޫން ކަމަށް ވޯލްޑް ފުޑް ޕްރޮގްރާމުން ވަނީ ބުނެފައެވެ. މިހާރު ފޯރުކޮށްދެވޭ އެހީގެ މިންވަރަކީ ބޭނުންވާ މިންވަރާއި އަޅާބަލާއިރު "ސައިސަމްސަލެއްހާ" މަދު މިންވަރެއް ކަމަށް އެ ޖަމްޢިއްޔާއިން ބުނެފައިވެއެވެ.

^{ޣައްޒާގެ ރައްޔިތުން “އެހީ” ހިފައިގެން ދަނީ: މިހާރު ފޯރުކޮށްދެވޭ އެހީގެ މިންވަރަކީ ބޭނުންވާ މިންވަރާއި އަޅާބަލާއިރު "ސައިސަމްސަލެއްހާ" މަދު މިންވަރެއް.}

މި ހަނގުރާމަ ފެށުނީއްސުރެ ޣައްޒާގައި ޝަހީދުވެފައިވާ މީހުންގެ އަދަދު މިހާރު ވަނީ 54,000 އަށްވުރެ އިތުރުވެފައެވެ. ރޭ އެންމެ ފަހުން ދިން ވައިގެ ހަމަލާތައް އަމާޒުކޮށްފައިވަނީ މީހުން ގިނަ ސަރަޙައްދުތަކަށެވެ.