ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް އަންނަ ޖުލައި މަހުގެ 26 ވަނަ ދުވަހު ހުޅުވަން ތައްޔާރުވަން ފަށައިފި އެވެ.

ހުޅުލޭ އައިލެންޑް ހޮޓެލުގައި މިއަދު ކުރިއަށް ގެންދާ "އޭވިއޭޝަން ފޯރަމް 2025"ގައި އެމްއޭސީއެލްގެ ޗީފް ޓެކްނޮޮލޮޖީ އޮފިސަރު ޝަފީގު އަހުމަދު ވިދާޅުވީ ވެލާނާ އެއާޕޯޓުގެ އާ ޓާމިނަލްގެ ބައެއް އަންނަ ޖުލައި މަހުގެ 26 ވަނަ ދުވަހު ހުޅުވަން މަސައްކަތް ކުރަމުން އަންނަ ކަމަށެވެ.

ޖުލައި 26 އަކީ ރާއްޖޭގެ މިނިވަން ދުވަހެވެ.

ޝަފީގު ވިދާޅުވީ ވެލާނާ އެއާޕޯޓުގެ ހިދުމަތް މިހާރަށް ވުރެ ރަނގަޅު ކުރުމަށް މުހިންމު މަސައްކަތްތަކެއް ކުރަމުން އަންނަ ކަމަށާއި އޭގެން އެންމެ މުހިންމު އެއް މަސައްކަތަކީ އާ ޓާމިނަލް ހުޅުވައި ހިދުމަތް ދޭން ފެށުން ކަމަށެވެ.

އޭނާ ވިދާޅުވި ގޮތުގައި، ޖުލައި 26 ގައި އާ ޓާމިނަލްގެ އެއްބައި ހުޅުވުމާއި އެކު ހިދުމަތްތަކަށް ވެސް ބަދަލުތައް އަންނާނެ އެވެ. ސެލްފް ޗެކިން ކައުންޓަރުތަކާއި ބެގޭޖު ޑްރޮޕް އިން ކައުންޓަރުތަކާއި އަދި އޮޓަމޭޓެޑް ބެގޭޖު ހެންޑްލިން ވެސް ފަށާނެ އެވެ.

އާ ޓާމިނަލް ހުޅުވުމަށް ފަހު، ތިންމަސްދުވަހުގެ ތެރޭގައި ކުރީގެ ޓާމިނަލުން ދެމުން އައި ހުރިހާ ހިދުމަތެއް އާ ޓާމިނަލަށް ބަދަލުކޮށް ނިންމާލެވޭނެ ކަމަށް އޭނާ ވިދާޅުވި އެވެ.

ރާއްޖޭގެ މައި އެއާޕޯޓުގެ އާ ޓާމިނަލްގެ މަސައްކަތުގެ ޖުމްލަ އަގު ހަތް ބިލިއަން ރުފިޔާ އަށް އަރަ އެވެ. އެ ޓާމިނަލަކީ އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) ލޯނު އެހީގައި ހަދަމުން އަންނަ ތަނެކެވެ.

އާ ޓާމިނަލް އެއްކޮށް ބޭނުން ކުރަން ފެށުމުން އަހަރަކު ގާތްގަނޑަކަށް 7.5 މިލިއަން ފަސިންޖަރުންނަށް ހިދުމަތް ދެވޭނެ އެވެ.