މި އަހަރުގެ މަސްވެރިންގެ ދުވަސް ފާހަގަކުރަން ބޭނުންވާ ރަށްރަށުން އެކަމަށް އެދި ހުށަހެޅުމުގެ ފުރުސަތު މަސްވެރިކަމާއި ބެހޭ މިނިސްޓްރީން މިއަދު ހުޅުވާލައިފި އެވެ.
މަސްވެރިކަމާއި ބެހޭ މިނިސްޓްރީން ބުނީ މަސްވެރިންގެ ދުވަސް ފާހަގަކުރުމަށް ބާއްވާ ރަސްމީ ހަފުލާތައް ބޭއްވުމަށް ބޭނުންވާ ރަށްރަށުން އެކަމަށް އެދި ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.
މަސްވެރިންގެ ދުވަސް ފާހަގަކުރަނީ ރާއްޖޭގެ މަސްވެރިންގެ އަގުވަޒަންކޮށް، މަސްވެރިންގެ މަސައްކަތްތަކަށް ތަރުހީބުދިނުމުގެ މަގުސަދުގަ އެވެ.
މަސްވެރިންގެ ދުވަހުގެ ހަފުލާތައް ބާއްވާނެ ރަށެއް ކަނޑައަޅާއިރު ބަލާނެ ކަންތައްތަކުގެ ތެރޭގައި ހިމެނެނީ؛
- ގައުމީ ފެންވަރުގައި ފާހަގަކުރާ ދުވަހެއް ހަމަ އެ އަހަރު އެ ރަށުގައި ފާހަގަކުރާ ރަށަކަށް ނުވުން
- މަސްވެރިންގެ ދުވަސް މީގެ ކުރިން ބާއްވާފައިވާ ރަށެއްގައި ދެވަނަ، ފަހަރަށް މަސްވެރިންގެ ދުވަސް ބޭއްވުމަށް އެދިފައިވާ ނަމަ، އެ ރަށެއްގައި މަސްވެރިންގެ ދުވަސް ބޭއްވިތާ 5 އަހަރު ވެފައިވުން.
- މުނާސަބަތުތައް ބޭއްވުމަށް އެ ރަށެއްގެ ރައްޔިތުން ޝައުގުވެރިވާ މިންވަރު ބެލުން.
- އުމްރާނީ ގޮތުން ރަށަށް އައިސްފައިވާ ކުރިއެރުންތަކުގެ ތަފްސީލް އަދި މީގެ އިތުރުން އަތޮޅުގެ އެހެން ރަށްރަށުގެ ބައިވެރިވުން ހޯދުމަށް ހުށަހަޅާފައިވާ މިންވަރާއި ދުވަހާއި ގުޅިގެން ރަށަށް ޒިޔާރަތްކުރާ މެހުމާނުންނަށް މެހުމާންދާރީ އަދާކުރުމުގެ އިންތިޒާމްތައް ރޭވިފައިވާ ގޮތާއި އެކަން ކުރުމުގެ ގާބިލްކަން ހުރި ނެތް މިންވަރު.
- ރަށަށް ޒިޔާރަތްކުރައްވާ މެހެމާނުން ތިއްބެވުމަށް ހަމަޖައްސަވާފައިވާ އިންތިޒާމުތަކުގެ އިތުރުން މަސްވެރިންގެ ދުވަސް ފާހަގަކުރުމަށް އެ ރަށަކުން ކުރުމަށް ހުށަހަޅާ ކަންކަން.
މިނިސްޓްރީން ބުނީ މަސްވެރިންގެ ދުވަސް ފާހަގަކުރުމަށް ރަށެއް ކަނޑައެޅުމުގައި އެ ރަށަކީ މަސްވެރި ރަށެއް ކަމުގައި ބަލާނެ ކަމަށެވެ. އަދި މަސްވެރި ރަށެއް ކަމުގައި ބެލުމުގައި އެ ރަށެއްގައި ރަޖިސްޓްރީ ކޮށްފައިވާ މަސްވެރިންގެ އަދަދާއި މަސްވެރި އުޅަނދުފަހަރުގެ އަދަދަށް ވެސް ބަލާނެ ކަމަށެވެ.
މަސްވެރިންގެ ދުވަސް ފާހަގަކުރުމަށް ބޭނުންވާ ރަށްރަށުން އެކަމަށް އެދޭ ފޯމު އަންނަ މަހުގެ 19 ވަނަ ދުވަހުގެ މެންދުރު 12:00 ގެ ކުރިން ޖެމްސް ޕޯޓަލް މެދުވެރިކޮށް ހުށަހެޅުމަށް މިނިސްޓްރީން ވަނީ އެދިފަ އެވެ.
