ރާއްޖޭގެ ސްޕޯޓްސް ޓޫރިޒަމް ފުޅާކުރުމަށްޓަކައި 10 ރަށެއްގައި އިންޑޯ ސްޕޯޓްސް ކޮމްޕްލެކްސްތައް ޤާއިމުކުރުމުގެ މަސައްކަތް ކުރިއަށްދާ ކަމަށް ކުޅިވަރާއި ހަށިހެޔޮކަމާބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ. މި މަޝްރޫޢުތައް ކުރިއަށް ގެންދެވޭނެ ގޮތް މިހާރު ވަނީ ހަމަޖެހިފައެވެ.
ވަޒީރު މިހެން ވިދާޅުވީ ކުޅިވަރު ޤާނޫނަށް ގެނެވުނު އިޞްލާޙުތަކާއި ގުޅޭގޮތުން ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައެވެ. ވަޒީރު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޞްދީޤު ކުރެއްވި ކުޅިވަރު ޤާނޫނަށް އިޞްލާޙު ގެނައުމުގެ ބިލުގެ ސަބަބުން ޤާނޫނަށް އައި ބަދަލުތަކާއެކު ރާއްޖޭގެ ސްޕޯޓްސް ޓޫރިޒަމް ކުރިއެރުވުމަށް މަގުފަހިވެގެންދާނެ ކަމަށެވެ. އަދި ރާއްޖޭގައި ސްޕޯޓްސް ޓޫރިޒަމް ފުޅާކުރުމަށް ރައީސުލްޖުމްހޫރިއްޔާގެ އިރުޝާދުގެ ދަށުން އެކި ސަރަހައްދުތަކުގައި ކުޅިވަރު ވަސީލަތްތައް ޤާއިމު ކުރައްވަމުންދާ ކަމަށް ވެސް ވިދާޅުވިއެވެ.
ކުރިޔަށް އޮތް ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ކުޅިވަރު ވަސީލަތްތައް ޤާއިމު ކުރެއްވުމަކީ ރައީސުލްޖުމްހޫރިއްޔާ ޑރ. މުޢިއްޒުގެ ވަޢުދުފުޅެކެވެ. އެހެންކަމުން އެކި ރަށްރަށުގައި ފިޓްނެސް އެންޑް ރެކްރިއޭޝަން ސެންޓަރުތަކާއި އައުޓްޑޯޖިމްތަކާއި، އެކި ކުޅިވަރުތައް ކުޅޭ ކޯޓުތަކާއި ދަނޑުތައް ޤާއިމުކުރުމުގެ މަސައްކަތް ސަރުކާރުން އަންނަނީ ކުރަމުންނެވެ. އޭގެ ތެރެއިން 77 އަށްވުރެ ގިނަ މަޝްރޫޢު މިހާރުވެސް ވަނީ އެމްޓީސީސީ އާއި ފެނަކަ އާއި އާރްޑީސީ އާއި ހަވާލުކޮށްފައެވެ.
ވަޒީރު ރާފިއު ފާހަގަކުރެއްވި ގޮތުގައި، މި އިންޑޯ ސްޕޯޓްސް ކޮމްޕްލެކްސްތަކުގެ ސަބަބުން ސްޕޯޓްސް ޓޫރިޒަމް ފުޅާވެ، ރާއްޖޭގެ އިޤްތިޞާދަށް އޭގެ ހެޔޮ އަސަރު ކުރާނެއެވެ.
