މާލެ ސަރަހައްދުގައި މަލްޓި ސްޕޯޓްސް ކޮމްޕެލްކްސްތަކެއް ގާއިމުކުރުމަށް ސްޕޯޓްސް މިނިސްޓްރީއާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އާ ދެމެދު އެއްބަސްވުމެއްގައި ސޮއިކޮށްފި އެވެ.

ސްޕޯޓްސް މިނިސްޓްރީގައި އިއްޔެ ބޭއްވި ރަސްމިއްޔާތެއްގައި އެ މަޝްރޫއުގެ އެއްބަސްވުމުގައި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދު އެވެ. ސްޕޯޓްސް މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަބްދުالله ރާފިއު އެވެ.

މި އެއްބަސްވުމުގެ ދަށުން މާލެ ސަރަހައްދުގައި ތިން ސްޕޯޓްސް ކޮމްޕްލެކްސް ގާއިމުކުރުމަށް ވަނީ ހަމަޖެހިފަ އެވެ. މި ސްޕޯޓްސް ކޮމްޕްލެކްސްތައް ގާއިމުކުރާނީ ވިލިމާލޭގެ އިތުރުން ހުޅުމާލޭގެ ފުރުތަމަ ފިޔަވައްސާއި ދެވަނަ ފިޔަވަހީގަ އެވެ.

މި އަހަރު ނިމުމުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށެއްގައި ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.

ރާއްޖޭގެ 63 ރަށެއްގައި ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުމަށް ސްޕޯޓްސް މިނިސްޓްރީއާއި އެމްއޭސީއެލްއާ ދެމެދު 18 އޮގަސްޓް 2025 ވަނަ ދުވަހު ވަނީ ސޮއިކޮށްފަ އެވެ.