ފަލަސްޠީނުގެ ޣައްޒާގެ ރައްޔިތުންގެ ނަސްލު ނައްތާލުމަށް ހައްދުފަހަނައެޅި އިސްރާއީލުގެ ޒަޔަނިސްޓުން ހިންގަމުންދާ ޤަތުލުޢާންމު ހުއްޓައިލުމަށް ބާރު އެޅުމުގެ ގޮތުން ޔަހޫދީންނާއި ދެކޮޅަށް ހަރުކަށި ފިޔަވަޅުތައް އެޅުމަށް ސްޕެއިންގެ ޚާރިޖީ ވަޒީރު ހޯސޭ މަނުއެލް އަލްބަރޭސް ގޮވައިލައްވައިފިއެވެ.
އަލްބަރޭސް މިފަދައިން ގޮވައިލެއްވީ އިއްޔެ ސްޕެއިންގެ ވެރިރަށް މެޑްރިޑުގައި ބޭއްވި 'ދަ މެޑްރިޑް ގްރޫޕު'ގެ ފަސްވަނަ ބައްދަލުވުމުގައެވެ. މި ބައްދަލުވުމުގައި ޔޫރަޕިއަން ޔޫނިއަން (އީޔޫ) އާއި ޢަރަބި ޤައުމުތަކުގެ މަތީ-ފަންތީގެ މަންދޫބުން ބައިވެރިވިއެވެ.
ބައްދަލުވުމުގައި ތަޤުރީރު ކުރައްވަމުން އަލްބަރޭސް ވަނީ، ފަލަސްޠީނުގެ ރައްޔިތުން ޝަހީދު ކުރުމަށާއި، އެ މީހުން ބަނޑަށްޖެއްސުމަށް ހިންގަމުންދާ ޖަރީމާތައް ވަގުތުން ހުއްޓައިލުމަށް ވެސް ޒަޔަނިސްޓުންނަށް ގޮވައިލައްވާފައެވެ.
މި ބައްދަލުވުމުގައި އީޔޫއާއި ޢަރަބި ޤައުމުތައް ހިމެނޭ ގޮތުން 20 ޤައުމެއްގެ މަންދޫބުންނާއި ގިނަ އަދަދެއްގެ ބައިނަލްއަޤްވާމީ ޖަމުޢިއްޔާތަޔާތަކުން ބައިވެރިވިއެވެ. ފަލަސްޠީނުގެ ބޮޑުވަޒީރު މުޙައްމަދު މުޞްޠަފާ ވެސް މި ބައްދަލުވުމުގައި ބައިވެރިވެ ވަޑައިގެންނެވިއެވެ.
އަލްބަރޭސް ވިދާޅުވިއެވެ. "މި ހިތާމަވެރި ވަގުތުގައި، ޣައްޒާއަށް ކުރިމަތިވެފައިވާ އިންސާނިއްޔަތު ކަމުގެ މުސީބާތުގައި، އަޅުގަނޑުމެންގެ އަމާޒަކީ ހަނގުރާމަ ހުއްޓުމަކަށް ގެނައުން، އަދި (ޣައްޒާގެ) ފުރަބަންދު ނިމުމަކަށް ގެނެސް އިންސާނީ އެހީގެ ސާމާނު އެއްވެސް ހުރަހަކާ ނުލައި އެތެރެ ކުރުމަށް ބާރުއެޅުން".
މި ބައްދަލުވުމުގައި ފަލަސްޠީނުގެ މިނިވަން ދައުލަތެއް ޤާއިމު ކުރުމާ ގުޅޭ ގޮތުން ވެސް މަޝްވަރާ ކުރެވުނެވެ. މި ގޮތުން، ޖޫން 17 ވަނަ ދުވަހު އދ އިން ބޭއްވުމަށް ހަމަޖެހިފައިވާ މަތީ-ފަންތީގެ ބައްދަލުވުމުގެ ތައްޔާރީތައް ވެސް މި ބައްދަލުވުމުގައި ކުރިއަށް ގެންދެވުނެވެ. އެ ބައްދަލުވުން އިންތިޒާމު ކުރަނީ ފަރަންސޭސިވިލާތާއި ސަޢޫދީ ޢަރަބިއްޔާ ގުޅިގެންނެވެ.
މިމަހުގެ 2 ވަނަ ދުވަހުން ފެށިގެން ޔަހޫދީ ފައުޖުން ވަނީ ޣައްޒާއަށް ކާބޯތަކެއްޗާއި އިންސާނީ އެހީގެ ސާމާނު އެތެރެ ކުރުމަށް ހުރަސް އަޅާފައެވެ. އަދި ޞިއްޙީ ފަރުވާއަށް ބޭނުންވާ ސާމާނާއި، އިންޖީނުގެތަކާއި ޖަނަރޭޓަރުތައް ހިންގުމަށް ބޭނުންވާ ތެލުގެ އިތުރުން އެއްގަމު އުޅަނދުފަހަރަށް ބޭނުންވާ ތެޔޮ އެތެރެ ކުރުން ވެސް ހުއްޓުވާފައެވެ.
ބައިނަލްއަޤްވާމީ މުޖުތަމަޢުގެ ފިއްތުންތަކާއި ގުޅިގެން ހުސްވި ހަފުތާގައި ޔަހޫދީން ވަނީ މަދު އަދަދެއްގެ ކާބޯތަކެއްޗާއި އިންސާނީ އެހީގެ ސާމާނު ޣައްޒާއަށް އެތެރެ ކުރުމުގެ ފުރުޞަތު ދީފައެވެ. ނަމަވެސް އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވި ގޮތުގައި، އެއީ ބަނޑަށްޖެހިފައިވާ ޣައްޒާގެ ރައްޔިތުންނަށް ބޭނުންވާ ކާބޯތަކެތީގެ "ސައިސަމުސަލެއްހާ" ކުޑަކުޑަ މިންވަރެކެވެ.
މި ބައްދަލުވުމުގައި ބައިވެރިވި ލީޑަރުން ވަނީ ޣައްޒާގެ ރައްޔިތުންނަށް ކުރިމަތިވެފައިވާ އިންސާނީ ހާލަތާ މެދު ކަންބޮޑުވުން ފާޅުކޮށް، ވަގުތުން ހަނގުރާމަ ހުއްޓާލުމަށާއި އިންސާނީ އެހީ ފޯރުކޮށްދިނުމަށް ގޮވާލާފައެވެ.
