ހުޅުމާލޭގެ މާސްޓަރ ޕްލޭން ރިވައިޒްކޮށްފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދާ އެއްގޮތަށް ކަމަށް އެޗްޑީސީގެ މެނޭޖިންގ ޑިރެކްޓަރ މުޙައްމަދު މައުރޫފް ޖަމީލް ވިދާޅުވެއްޖެއެވެ.
މިއަދު ހުޅުމާލޭގެ ބޭއްވުނު މާސްޓަރ ޕްލޭނާއި އެޗްޑީސީގެ ރަސްމީ ވެބްސައިޓް އިފްތިތާޙުކުރުމުގެ ރަސްމިއްޔާތުގައި ވާހަކަފުޅުދައްކަވަމުން މައުރޫފް ވިދާޅުވީ ބިންވެރިޔާ ސްކީމުން ދޫކުރި ގޯތިތަކަށް އެއްވެސް އަސަރެއް ނުކުރާގޮތަށް ބަނދަރުގެ ޖާގަ އިތުރުކުރެވޭނެކަމަށެވެ.
މައުރޫފް ވިދާޅުވި ގޮތުގައި، ހުޅުމާލޭގެ މާސްޓަރ ޕްލޭން ރިވައިޒްކުރަން ޖެހުނު މައިގަނޑު ސަބަބަކީ ހުޅުމާލޭގެ ބަނދަރުގެ ބޮޑު ބައެއް ހިއްކާފައިވުމުން ބަނދަރުގެ ޖާގަ އެކަށީގެންވާ ވަރަށް ބޭނުން ނުކުރެވުމެވެ. "ރަށެއްގެ ބަނދަރަކީ އެ ރަށަކަށް އެންމެ މުހިންމު އެއް ބައި. ބަނދަރެއް ނެތި އެހެން ވަސީލަތްތަކެއް ރަނގަޅަކަށް ނުހިނގާނެ," މައުރޫފް ވިދާޅުވިއެވެ.
މި މާސްޓަރ ޕްލޭން ފައިނަލް ކުރުމުގެ ކުރިން ސްޓޭކްހޯލްޑަރުންނާއެކު ޕަބްލިކް ކޮންސަލްޓޭޝަންއެއް ބޭއްވުމަށްފަހު ޑޮކިއުމަންޓް ކުރެވިގެންދާނެ ކަމަށްވެސް މައުރޫފް ވިދާޅުވިއެވެ.
މިއަދު ލޯންޗްކުރި އެޗްޑީސީގެ އައު ވެބްސައިޓްގައި ވިސްލްބްލޯވަރުންނަށް ޚާއްޞަ ޕޯޓަލްއެއް ހިމެނިފައި ވެއެވެ. އަދި އެޗްޑީސީގެ ސްޓްރެޓެޖިކް އެކްޝަން ޕްލޭންއެއްވެސް މި ވެބްސައިޓުން ފެންނަން ހުންނާނެއެވެ.
