ދިވެހިރާއްޖޭގެ ލީޑިންގ ޓެލެކޮމިއުނިކޭޝަން ކުންފުނި ދިރާގުން ދައުލަތުގެ ބެލުމުގެ ދަށުގައިވާ ކުދިން ބަލަހައްޓާ މަރުކަޒުތަކަށް 230،380 ރުފިޔާ ހަދިޔާކޮށްފިއެވެ. މި ފައިސާ ހަދިޔާކޮށްފައިވަނީ ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) އިސްނެގުމުގެ ދަށުން ކަަމަށް އިޖްތިމާއީ އަދި އާއިލީ ތަރައްގީއާ ބެހޭ ވުޒާރާއިން ހާމަކުރިއެވެ.
އިޖްތިމާއީ އަދި އާއިލީ ތަރައްގީއާ ބެހޭ ވުޒާރާއިން ވިދާޅުވި ގޮތުގައި، މި އެހީއަކީ ދައުލަތުގެ ބެލުމުގެ ދަށުގައި ތިބޭ ކުދިންނަށް އެހީތެރިކަން ފޯރުކޮށްދިނުމުގެ ގޮތުން ރޯދަ މަހު ހިންގި ޕްރޮގްރާމެއްގެ ބައެކެވެ. މި ޕްރޮގްރާމަށް ވަރަށް ބޮޑު ތަރުހީބެއް ލިބިފައިވާ ކަމަށްވެސް އެ ވުޒާރާއިން ފާހަގަކުރިއެވެ.
ދިރާގުން މި ފައިސާ ރަސްމީކޮށް ހަވާލުކޮށްފައިވަނީ އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއަށެވެ. އެ ވުޒާރާގެ ފަރާތުން މި ފައިސާއާ ހަވާލުވެވަޑައިގަތީ ވަޒީރު ޑރ. އާއިޝަތު ޝިހާމެވެ. ދިރާގުގެ ފަރާތުން ފައިސާ ހަވާލުކޮށްދެއްވީ އެ ކުންފުނީގެ ސީއީއޯ އިސްމާއިލް ރަޝީދެވެ.
ދިރާގަކީ އިޖްތިމާއީ އެކި ދާއިރާތަކުން ރައްޔިތުންނަށާއި އެކި ޖަމިއްޔާތަކަށް އެހީތެރިކަން ފޯރުކޮށްދިނުމަށް މަސައްކަތްކުރާ ކުންފުންޏެއްކަން ފާހަގަ ކުރެވެއެވެ. އެ ކުންފުނީގެ ސީއެސްއާރު ޕްރޮގްރާމްގެ ދަށުން މީގެ ކުރިންވެސް ވަނީ ގިނަ ފަރާތްތަކަށް އެހީތެރިކަން ފޯރުކޮށްދީފައެވެ.
