ކުއްލި ހާލަތްތަކުގައި އަމަލުކުރާނެ ގޮތުގެ ތަމްރީނު ޕްރޮގްރާމެއް ސޯޝަލް މިނިސްޓްރީން ކުރިއަށް ގެންގޮސްފި އެވެ.
މި ކަމާ ގުޅިގެން ސޯޝަލް މިނިސްޓްރީން ބުުނެފައިވާ ގޮތުގައި، މި ތަމްރީނު ޕްރޮގްރާމުގެ މައިގަނޑު މަގުސަދަކީ އަލިފާނުގެ ހާދިސާތަކުން ރައްކާތެރިވުމާއެކު، ދިމާވެދާނެ ގުދުރަތީ ހާދިސާއަކުން ލިބިދާނެ ގެއްލުން ކުޑަކުރުމަށް އެފަދަ ހާލަތްތަކުގައި އަމަލުކުރާނެ ގޮތުގެ އެމަޖެންސީ ޕުލޭނެއް އެކުލަވާލައި، އެކަމަށް މުވައްޒަފުންނާއި ކުދިން އަހުލުވެރިކޮށް، އެފަދަ ހާލަތަކަށް ތައްޔާރުވުމަށް ބޭނުންވާ އަމަލީ ތަމްރީނު ފޯރުކޮށްދިނުމެވެ.
މި ތަމްރީނު ޕްރޮގްރާމު ކުރިއަށް ގެންގޮސްފައިވަނީ ފެމިލީ އެންޑް ޗިލްޑްރަން ސާވިސް ސެންޓަރުގެ މުވައްޒަފުންނާއި ކުދިންނަށް އަމާޒުކޮށެވެ.
މިއީ ރާއްޖޭގެ އެކި ކަންކޮޅުތަކުގައި ގާއިމުކުރެވިފައިވާ ދައުލަތުގެ ބެލެހެއްޓުމުގެ ދަށުގައި ތިބޭ އާއިލާތަކާއި ކުޑަކުދިނަށް ހިދުމަތްދޭ އަމާންހިޔާތަކުގެ ފެންވަރު ރަނގަޅުކޮށް، ހިދުމަތް ފުޅާކޮށް، އެތަންތަނުގެ ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެލެއްވި ވައުދުފުޅާ އެއްގޮތްވާ ގޮތުގެ މަތިން ކުރިއަށް ގެންގޮސްފައިވާ ތަމްރީނު ޕްރޮގްރާމެއް ކަމަށް އެ މިނިސްޓްރީން ވަނީ ބުނެފަ އެވެ.
މީގެ އިތުރުން މި ތަމްރީނު ޕްރޮގްރާމުގައި އަލިފާނުގެ ހާދިސާއެއް ހިނގައިފިނަމަ އަމަލުކުރަންވީ ގޮތުގެ މައުލޫމާތު ދިނުމުގެ އިތުރުން، މިފަދަ ހާދިސާތަކުން ރައްކާތެރިވާނެ ގޮތުގެ އަމަލީ ތަޖުރިބާ ފޯރުކޮށްދެވުނުކަމަށާއި، އަދި ކުއްލި ހާލަތްތަކުގައި އަމަލުކުރަންވީ ގޮތްތައް ކިޔައިދެވިފައިވާ ކަމަށް ވެސް އެ މިނިސްޓްރީން ވަނީ ބުނެފަ އެވެ.
އިންސާނީ ވަސީލަތްތައް ތަރައްގީކުރުމަކީ ހިދުމަތުގެ ފެންވަރު އިތުރަށް ރަނގަޅުކޮށް ހަރުދަނާކުރުމަށް އެޅޭ އެންމެ މުހިންމު އެއް ފިޔަވަޅު ކަމަށްވާއިރު، މި އަހަރު ނިމުމުގެ ކުރިން އެ މިނިސްޓްރީގެ ދަށުން ހިންގަމުންދާ އެންމެހައި އަމާންހިޔާތަކުގައި މި ޕްރޮގްރާމް ބޭއްވުމަށް ހަމަޖެހިފައިވާ ކަމަށް ސޯޝަލް މިނިސްޓްރީން ވަނީ ބުނެފަ އެވެ.
ސޯޝަލް މިނިސްޓްރީން އިތުރަށް ބުނެފައިވާ ގޮތުގައި، މިފަދަ ޕްރޮގްރާމްތަކުގެ ސަބަބުން އަމާން ހިޔާތަކުގެ ފެންވަރު ރަނގަޅުކޮށް، އެތަންތަނުގެ ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅުގެ ބޮޑު ބައެއް ފުރިހަމަވެގެންދާނެ އެވެ.
