ކުޑަކުދިންގެ ޙައްޤުތައް ރައްކާތެރިކުރުމުގައި މައިންބަފައިންގެ ދައުރަކީ އެންމެ އިސް އަދި އެންމެ އަގުހުރި ދައުރު ކަމަށް އިޖްތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ބުނެފިއެވެ.
ވުޒާރާއިން ބުނީ ދަރިންނަށް ޖިސްމާނީ އަދި ނަފްސާނީ ގޮތުން ދުޅަހެޔޮ އަދި އުފާވެރި ދިރިއުޅުމެއް އުޅުމަށް މަގުފަހިކޮށްދިނުމަށްޓަކައި، ލޯތްބާއި، އެހީތެރިކަމާއި އަދި މަގުދެއްކުން ފޯރުކޮށްދިނުމަކީވެސް މައިންބަފައިންގެ މުހިންމު މަސްއޫލިއްޔަތެއް ކަމަށެވެ. ހަމައެހެންމެ، ދަރިންނަށް ހެޔޮ އަދި ނުބައި ވަކިކޮށްދިނުމާއި، މުޖުތަމަޢަށް ފައިދާ ހުރި ބައެއްގެ ގޮތުގައި ތަރުބިއްޔަތުކޮށް، ދުނިޔެއަށް ތައްޔާރުކޮށްދިނުމަކީ ވެސް މައިންބަފައިންނާއި ބެލެނިވެރިންގެ އަގުހުރި ޒިންމާއެއް ކަމަށް ވުޒާރާއިން ބުންޏެވެ.
ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގައި ބަޔާންކޮށްފައިވާ ގޮތުން، މައިންބަފައިންގެ ޒިންމާތަކުގެ ތެރޭގައި ހިމެނެނީ، ކުއްޖާގެ ޙައްޤުތައް ރައްކާތެރިކޮށްދީ، ޙިމާޔަތްކޮށްދިނުމާއި، ކުއްޖާ ދުޅަހެޔޮ ޞިއްޙަތެއްގައި ހެދިބޮޑުވުމަށް ބޭނުންވާ ކާނާއާއި ބޯހިޔާވަހިކަމާއި ސާފުފެނާއި އެނޫންވެސް ރައްކާތެރިކަން ލިބިދިނުމާއި، ކުއްޖާއަށް ދޭންޖެހޭ ވެކްސިން ދިނުމާއި، ޞިއްޙީ ފަރުވާ ލިބިދިނުމާއި، ކުއްޖާގެ ނަފްސާނީ އަދި ޖިސްމާނީ ދުޅަހެޔޮކަމާއި، ކުއްޖާގެ ރައްކާތެރިކަމާއި، ކުއްޖާގެ ތަރައްޤީއަށް މަގުފަހިކޮށްދިނުމަށް ކުރަންޖެހޭ އެންމެހައި ކަންކަން ކުރުން ކަމަށް ވުޒާރާއިން ބުންޏެވެ.
މީގެ އިތުރުން، އުފަންވުން ރަޖިސްޓަރީ ކުރުމާއި، ކުއްޖާ ތަރުބިއްޔަތުކުރުމާއި އުނގަންނައިދިނުމާއި، ކުއްޖާގެ ފަރާތުން ޤާނޫނުގެ ކުރިމައްޗަށް ހާޒިރުވުމާއި، ޚަރަދު ދިނުމާއި، ކުއްޖާ އެހެން ފަރާތަކަށް ދޭ ގެއްލުމަށް ޒިންމާވުންވެސް ކުއްޖާގެ ބެލެނިވެރިޔާގެ ޒިންމާތަކުގެ ތެރޭގަ ހިމެނޭކަމަށް ވުޒާރާއިން ބުންޏެވެ. ހަމައެއާއެކު ކުށަށް އަރައިގަތުމުގެ ނުރައްކަލުގައި ތިބޭ ކުދިން ކުށްކުރުމުން ރައްކާތެރިކޮށް ދުރުހެލިކުރުމަށްޓަކައި ދައުލަތުގެ ކަމާބެހޭ ފަރާތްތަކުން ހިންގާ ޕްރޮގްރާމްތަކުގައި ކުއްޖާ ބައިވެރިކުރުވައި، އެއްބާރުލުންދިނުމާއި، މިފަދަ ޕްރޮގްރާމްތަކުގައި މައިންބަފައިންނާއި ބެލެނިވެރިން ބައިވެރިވާންޖެހޭ ޙާލަތްތަކުގައި ބައިވެރިވުމަކީ ވެސް މައިންބަފައިންގެ ޒިންމާއެއް ކަމަށް ވުޒާރާއިން ބުންޏެވެ.
ވުޒާރާއިން ބުނީ މައިންބަފައިންގެ މައްޗަށް ލާޒިމުވެގެންވާ މި ޒިންމާ އިޚްލާޞްތެރިކަމާއި، އަދި ހަރުދަނާކަމާއެކު އުފުލައި، އަދާކުރުމުން ދަރިންނަށް ހިތްހަމަޖެހޭ އަދި ރައްކާތެރި މާޙައުލެއް ގާއިމުކުރެވިގެންދާނެ ކަމަށެވެ.
މައިންބަފައިންނާއި ބެލެނިވެރިންގެ މި މަސްއޫލިއްޔަތުގެ މުހިންމުކަން ވިސްނައިގަނެ، އެކަން ފުރިހަމައަށް އަދާކުރުމަށް ޢަމަލީގޮތުން މަސައްކަތްކުރުމަކީ، ކޮންމެ ކުއްޖަކަށްވެސް އެކުއްޖެއްގެ ފުރިހަމަ ޤާބިލިއްޔަތު ޙާޞިލުކުރުމުގެ ފުރުޞަތު ލިބި ދުޅަހެޔޮ މުޖުތަމަޢެއް ބިނާކުރުމަށް ވެސް މަގުފަހިކޮށްދޭނެ ކަމެއް ކަމަށް ވުޒާރާއިން ބުންޏެވެ.
