ކުޑަކުދިންނަށް އަނިޔާކުރުމުގެ 97 މައްސަލައެއް މިދިޔަ މަހު ރިޕޯޓްކޮށްފައިވާ ކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ބުނެފި އެވެ.
ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ކޮންމެ މަހަކު އާންމުކުރާ ތަފާސްހިސާބުތަކުގެ ތެރެއިން އާންމުކުރި މިދިޔަ މަހުގެ ތަފާސްހިސާބުތައް ދައްކާ ގޮތުގައި، މިދިޔަ މަހު ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 97 މައްސަލައެއް ރިޕޯޓްކޮށްފައިވެ އެވެ.
އެންމެ ގިނައިން ރިޕޯޓުކޮށްފައި ވަނީ ކުޑަކުދިންނަށް އިހުމާލުވުމުގެ މައްސަލަތަކެވެ. އެ ބާވަތުގެ 23 މައްސަލައެއް ރިޕޯޓުކޮށްފައިވެ އެވެ.
ދެން އެންމެ ގިނައިން ރިޕޯޓްކޮށްފައި ވަނީ ޖިސްމާނީ ހާނިކައިގެ މައްސަލަތަކެވެ. އެ ބާވަތުވެ 22 މައްސަލައެއް ރިޕޯޓްކޮށްފައިވެ އެވެ.
މިނިސްޓްރީން ބުނީ ޖިންސީ ހާނިކައިގެ 16 މައްސަލައަކާއި ނަފްސާނީ ހާނިކައިގެ 13 މައްސަލައަކާއި ގެވެށި އަނިޔާގެ އަމަލެއް ކުރާތަން ދެއްކުން ނުވަތަ ފެނުމުގެ 12 މައްސަލައަކާއި އެހެން ކުދިންގެ ފަރާތުން ގަނާލިބުމުގެ ހަ މައްސަލައަކާއި ބިރުދެއްކުމުގެ ގޮތުން ކުރެވޭ ކަންކަން ނުވަތަ ބްލެކްމެއިލް ކުރުމުގެ ހަތަރު މައްސަލަައެއް އަދި އެހެން ކުދިންގެ ފަރާތުން އިންޓަނެޓް މެދުވެރިކޮށް ގަނާ ލިބުމުގެ މައްސަލައެއް ވެސް ރިޕޯޓްކޮށްފައިވާ ކަމަށެވެ.
މިދިޔަ މަހު އެންމެ ގިނައިން ރިޕޯޓްކޮށްފައި ވަނީ ފިރިހެން ކުދިންނާ ގުޅުންހުރި މައްސަލަތަކެވެ.
ފިރިހެން ކުދިންނާ ގުޅުންހުރި 52 މައްސަލައެއް އަދި އަންހެން ކުދިންނާ ގުޅުންހުރި 45 މައްސަލައެއް މިނިސްޓްރީއަށް ރިޕޯޓްކޮށްފައިވެ އެވެ.
