ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރު ވެރިކަމަށް އައި ފަހުން، ހާއްސަ އެހީއަށް ބޭނުންވާ 356 މީހުންނަށް ވަޒީފާ ދީފައިވާ ކަމަށް ޖެންޑާ މިނިސްޓަރު ޑރ. އައިޝަތު ޝިހާމް ވިދާޅުވެއްޖެ އެވެ.
"ތަރުޖަމާނާ އެކު" ޕްރޮގްރާމުގެ 4 ވަނަ އެޕިސޯޑުގައި ވާހަކަފުޅު ދައްކަވަމުން މިނިސްޓަރު ވިދާޅުވީ ރައްޔިތުންގެ ހާލަތު ބެލުމަށް ކުރިއަށްގެންދާ "ހާލު ކިހިނެއް" ޕްރޮގްރާމުގެ ތެރެއިން މިހާތަނަށް 17 އަތޮޅެއްގެ 17،000 އަށް ވުރެ ގިނަ ގޭބިސީއަށް ޒިޔާރަތްކޮށްފައިވާ ކަމަށެވެ.
ވަޒީރު ފާހަގަކުރެއްވި ގޮތުގައި މި ޒިޔާރަތްތަކުން އެންމެ ބޮޑަށް ފާހަގަކުރެވުނު އެއް ޝަކުވާއަކީ ނުކުޅެދުންތެރިކަން ހުންނަ ފަރާތްތަކަށް ވަޒީފާ ނުލިބުމުގެ މައްސަލައެވެ. ހާއްސަކޮށް މާލެ ސަރަހައްދުގައި ބޯހިޔާވަހިކަމުގެ ދަތިކަމުގެ ޝަކުވާ ބޮޑުއިރު، އަތޮޅުތަކުގައިވެސް އެކި ބޭނުންތައް ހުރިކަން ވަނީ ފާހަގަކުރެވިފަ އެވެ.
މިނިސްޓަރު ވިދާޅުވި މިއަދާ ހަމައަށް 356 ކުދިންނަށް، ނުކުޅެދުންތެރިކަން ހުންނަ ފަރާތްތަކަށް މާލޭގައާއި އަތޮޅުތަކުގައާއި ވަޒީފާ ފޯރުކޮށްދެވިފައިވާ ކަމަށެވެ.
ސަރުކާރުން ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ހަރުދަނާ އުސޫލުތަކެއް ގެންގުޅެމުންދާކަން ފާހަގަކުރައްވަމުން މިނިސްޓަރު ވިދާޅުވީ ނުކުޅެދުންތެރިކަން ހުންނަ މީހުން ވަޒީފާގެ މާހައުލަށް ތައްޔާރުކުރުމަށްވެސް ހާއްސަ މަސައްކަތްތަކެއް ކުރެވެމުންދާ ކަމަށެވެ. އެގޮތުން 'ޖޮބް-ރެޑިނަސް ޕްރޮގްރާމް' ގެ ނަމުގައި މިހާރު ވަނީ ޕްރޮގްރާމެއް ފަށައި އެ ފުރުސަތު ހުޅުވާލާފަ އެވެ.
މި ޕްރޮގްރާމަކީ ހާއްސަ އެހީއަށް ބޭނުންވާ ފަރާތްތަކަށް މަސައްކަތުގެ މާހައުލަށް ބޭނުންވާ އަސާސީ ތައުލީމާއި ހުނަރުތައް ދަސްކޮށްދީ، އެ ފަރާތްތައް ވަޒީފާއަށް ބިނާކުރުމުގެ މަގްސަދުގައި ކުރިއަށްގެންދާ ޕްރޮގްރާމެކެވެ. މިއީ މިފަދަ ފަރާތްތަކަށް މުޖުތަމައުގައި ބާރުވެރިކަން ހޯދައިދީ، އަމިއްލަ ފައިމައްޗަށް ތެދުވުމަށް އެހީތެރިވުމަށް ސަރުކާރުން އަޅާފައިވާ މުހިންމު ފިޔަވަޅެއްކަމަށް މިނިސްޓަރު ފާހަގަކުރެއްވި އެވެ.
