މި ސަރުކާރުން ވެރިކަމަށް އައިފަހުން ދައުލަތުގެ ބެލުމުގެ ދަށުގައި ތިބި 110 ކުދިން އާއިލާތަކާ ހަވާލުކޮށްފި ކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ އާއިޝަތު ޝިހާމް މިއަދު ވިދާޅުވެއްޖެ އެވެ.
މިނިސްޓަރު މިކަން ހާމަކޮށްފައިވަނީ އެ މިނިސްޓްރީގެ މަސައްކަތްތަކާއި ގުޅޭގޮތުން ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގަ އެވެ.
ދައުލަތުގެ ބެލުމުގެ ދަށުގައި ތިބޭ ކުދިންނަށް ހާއްސަކޮށް ހިންގުމަށް ނިންމާފައިވާ "ކޮންމެ ކުއްޖަކަށް އާއިލާއެއް" ޕްރޮގްރާމަކީ، ސަރުކާރުން ހާއްސަ އިސްކަމެއް ދީގެން އިޖުތިމާއީ ދާއިރާއިން ކުރަން ރާވާފައިވާ އެންމެ މުހިންމު އެއް މަސައްކަތެވެ.
މިމަސައްކަތާއި ގުޅޭގޮތުން ވާހަކަ ދައްކަވަމުން މިނިސްޓަރު އާއިޝަތު ޝިހާމް ވިދާޅުވީ، އެކި ހާލަތްތަކުގައި އާއިލާތަކުން ނެގޭ ކުދިން ބެލެހެއްޓުމުގެ ޒިންމާ އެ ވުޒާރާއިން ފުރިހަމައަށް އަދާ ކުރަމުންދާ ކަމަށެވެ. އަދި މިގޮތަށް ކުދިން ގެންގުޅުނު ނަމަވެސް އާއިލާތަކާއި ދުރުގައި ކުދިން ގެންގުޅުމަކީ، އެކުދިންނަށް ބޭނުންވާ ހުނަރުތައް މަދުވާ ކަމެއްކަން ފާހަގަކުރެވިފައިވާ ކަމަށް ވިދާޅުވި އެވެ.
ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ފާހަގަކުރި ގޮތުގައި މިހާރު މިކަމުގައި އެންމެ ބޮޑަށް ލިބޭ ހިތްހަމަޖެހުމަކީ، ކުދިންނާއި ހަވާލުވާ އާއިލާތަކުގެ އަދަދު އިތުރުވަމުން ދިއުމެވެ. އަދި ގެންދާ ކުދިން އެ އާއިލާތަކުން ބަލަހައްޓަމުން ދަނީ ވަރަށް ރަނގަޅަށް ކަމަށް މިނިސްޓަރު ވިދާޅުވި އެވެ.
"ރައީސުލްޖުމްހޫރިއްޔާގެ ވައުދެއް ކޮންމެ ކުއްޖަކަށް އާއިލާއެއް. މި ޕްރޮޖެކްޓުގެ ދަށުން 2023 ގެ ނޮވެމްބަރުން ފަށައިގެން 110 ކުދިން އެކުދިންގެ އާއިލާއަށް ނޫނީ، އާ އާއިލާތަކާއި ހަވާލުކުރެވިގެން ވަރަށް ރަނގަޅަށް އެބަހިނގާ. އަޅުގަނޑުމެންގެ އެދުމަކީ މި ޕްރޮގްރާމުގައި ބައިވެރިވެ ކުދިން ބެލެހެއްޓުމުގައި މިނިސްޓްރީއާ ގުޅިގެން މަސައްކަތް ކުރުން،" މިނިސްޓަރު އާއިޝަތު ޝިހާމް ވިދާޅުވިއެވެ.
މިނިސްޓަރު ވިދާޅުވީ ސަރުކާރުން ހިންގަމުންދާ ކޮންމެ ކުއްޖަކަށް އާޢިލާއެއް ޕްރޮގްރާމުގެ އިތުރުން އަމާން ވެށިތައް އިތުރަށް ތަރައްގީކޮށް ކުދިންނަށް ފަހި ފުރުސަތުތަކެއް ހޯދައިދިނުމަށް މަސައްކަތް ކުރަމުންދާ ކަމަށެވެ. އަދި މި މަސައްކަތުގެ ތެރެއިން މިފަހުން ފ. އަތޮޅުގައި އަމާންވެއްޓެއް ގާއިމުކޮށްފައިވާ ކަމަށްވެސް ވިދާޅުވިއެވެ.
އަދި މިމަސައްކަތާއިއެކު އަމާންވެށިތަކުގައި މިހާރުވެސް ގެންގުޅޭ ކުދިން އެތަނުން ނިމޭވަރަކުން މުޖުތަމައުއަށް ބޭނުންތެރި ބަޔަކަށް ހެދުމަށް އިންޓާންޝިޕް ފުރުސަތު ހޯދައިދީ، އެކުދިންނަށް އަމިއްލަ ފައިމައްޗަށް ތެދުވެވޭނެ ފުރުސަތު ހޯދައިދެމުންދާ ކަމަށާއި މިކަމުގައިވެސް ގިނަ ކާމިޔާބީތަކެއް ހޯދާފައިވާކަން މިނިސްޓަރު ފާހަގަކުރެއްވިއެވެ. އޭގެ އިތުރުން މިނިސްޓްރީން މިއަހަރު ކުރި މަސައްކަތުން 23 ކުދިންނަށް އިންޓާންޝިޕް ފުރުސަތު ހޯދައިދީ، 40 ކުދިންނަށް އެކި ތަމްރީނުތައް ދީފައިވާ ކަމަށްވެސް މިނިސްޓަރު ވިދާޅުވިއެވެ.
