ދާންމަތިވެފައިވާ އިސްރަށްވެހިންގެ އިޖްތިމާޢީ ބޭނުންތަކާއި އެހީތެރިކަން ފޯރުކޮށްދިނުމަށް ސަރުކާރުން ކުރިއަށްގެންދާ ޚާއްސަ ޕްރޮގްރާމެއް ރަސްމީކޮށް އިފްތިތާޙުކޮށްފިއެވެ. އިއްޔެ މި ޕްރޮގްރާމް ރަސްމީކޮށް އިފްތިތާޙުކޮށްދެއްވީ އިޖްތިމާޢީ އަދި ޢާއިލީ ތަރައްޤީއާބެހޭ ވަޒީރު ޑރ. ޢާއިޝަތު ޝިހާމްއެވެ.
"ދާންމަތިވެފައިވާ ފަރާތްތަކުގެ ގޭގެއަށް ޒިޔާރަތްކުރުން" ގެ ނަމުގައި ފަށާފައިވާ މި ޕްރޮގްރާމަކީ، އިސްރަށްވެހިންގެ އުފަލާއި ހިތްހަމަޖެހުމަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ. މި ޕްރޮގްރާމްގެ ދަށުން، ދާންމަތިވެފައިވާ ފަރާތްތަކުގެ ގޭގެއަށް މަހަކު އެއްފަހަރު ޒިޔާރަތްކުރުމަށް ވަނީ ހަމަޖެހިފައެވެ.
އިފްތިތާޙީ ރަސްމިއްޔާތުގައި ވާހަކަފުޅު ދައްކަވަމުން، ވަޒީރު ޑރ. ޢާއިޝަތު ޝިހާމް ވިދާޅުވީ މި ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމދު މުޢިއްޒުގެ އިރުޝާދާއި އެއްގޮތަށް ކުރިއަށްގެންދާ އިޖްތިމާޢީ ޕްރޮގްރާމްތަކުގެ ތެރެއިން އެއް ޕްރޮގްރާމް ކަމަށެވެ. އަދި މި ޕްރޮގްރާމްގެ ސަބަބުން ދާންމަތިވެފައިވާ މީހުންނާއި އެމީހުންގެ ޢާއިލާތަކަށް ލިބެންޖެހޭ އިޖްތިމާޢީ އެހީތެރިކަން ދެނެގަނެވި، ބޭނުންވާ އެހީތައް ފޯރުކޮށްދިނުމަށް މަގުފަހިވެގެންދާނެ ކަމަށް ވިދާޅުވިއެވެ.
Advertisement
"މި ޕްރޮގްރާމްގެ މައިގަނޑު މަޤްޞަދަކީ ދާންމަތިވެފައިވާ އިސްރަށްވެހިންނަށް ބޭނުންވާ އިޖްތިމާޢީ އެހީތެރިކަން ފޯރުކޮށްދިނުމާއި، އެމީހުންނަކީވެސް މުޖުތަމަޢުގައި ޝާމިލްވެގެން އުޅޭ ބަޔަކަށް ހެދުން،" ވަޒީރު ވިދާޅުވިއެވެ.
މި ޕްރޮގްރާމްގައި އިސްރަށްވެހިންނާއެކު ޒުވާން އުމުރުފުރާގެ ކުދިންވެސް ބައިވެރިވާނެކަމަށް ވަޒީރު ހާމަކުރެއްވިއެވެ.
އިޖްތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ކުރިން ފަށާފައިވާ "ހާލު ކިހިނެއް" ޕްރޮގްރާމްގެ ދަށުން މިހާތަނަށް 12,000 އަށްވުރެ ގިނަ ގޭބީސީއަށް ޒިޔާރަތްކޮށް، އެފަރާތްތަކުގެ ޙާލަތު ދެނެގަނެވިފައިވާކަން ވެސް ފާހަގަކޮށްލެވެއެވެ.
