ފަގީރުން މަދުކުރުމަށް އެމްއައިބީއާއެކު މަޝްވަރާކޮށްފި

ރާއްޖޭގައި އުޅޭ ފަގީރުން މަދުކުރުމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން އިސްލާމިކް ބޭންކް (އެމްއައިބީ)އާއެކު މަޝްވަރާތައް ފަށައިފި އެވެ.

މިނިސްޓްރީން އިއްޔެ އެކްސްގައި ކުރި ޕޯސްޓެއްގައި ބުނީ ރާއްޖޭގައި ފަގީރުކަން މަދުކުރުމުގެ މަސައްކަތް އެމްއައިބީން އެ މިނިސްޓްރީއާ އެކު ކުރިއަށް ގެންދިއުމުގެ މަޝްވަރާތައް ފަށާފައިވާ ކަމަށެވެ. އެ ޕްރޮގްރާމް ކުރިއަށް ގެންދިއުމަށް އެމްއައިބީގެ އިސް މުއައްސިސުންނާއި މިނިސްޓަރު ޑރ. އާއިޝަތު ޝިހާމް ބައްދަލުކުރައްވާފައިވާ ކަމަށް ބުންޏެވެ.

އެ ބައްދަލުވުމުގައި ފުދުންތެރިކަން ދަށް އާއިލާތަކަށް ނުވަތަ ނާޒުކު ހާލަތްތަކުގައި ދިރިއުޅޭ މީހުންނަށް އަމާޒުކޮށްގެން ހާއްސަ ޕްރޮގްރާމެއް ކުރިއަށް ގެންދިއުމާ ގުޅޭ ގޮތުން މަޝްވަރާކޮށްފައިވާ ކަމަށް މިނިސްޓްރީން ބުންޏެވެ.

އެ ޕްރޮގްރާމުގެ ދަށުން މަޝްވަރާކޮށްފައި ވަނީ;

• އާމްދަނީ އިތުރުކުރުމާއި ވަޒީފާގެ ފުރުސަތުތައް ފަހިކުރުން

• އަސާސީ ހިދުމަތްތަކަށް ވާސިލުވުމަށް އެހީތެރިކަން ފޯރުކޮށްދިނުން

• ކުދި އަދި މެދުފަންތީގެ ވިޔަފާރިތަކަށް އެހީތެރިކަން ފޯރުކޮށްދިނުން

• އާމްދަނީ ހޯދޭނެ މަސައްކަތްތައް ދަސްކޮށްދީ، ވަސީލަތްތައް ފޯރުކޮށްދިނުން

މިނިސްޓްރީން ބުނި ގޮތުގައި, އެމްއައިބީން ވަނީ ވަނީ މިއީ ދިވެހި މުޖުތަމައުގައި ތިބި އެންމެ ނިކަމެތި މީހުންގެ ދިރިއުޅުމުގެ ހާލަތު ރަނގަޅުކުރުމަށް އެހީތެރިވެދޭނެ ޕްރޮގްރާމެއް ކަމަަށް ފާހަގަކޮށްފަ އެވެ.

ނާޒުކު ހާލަތްތަކުގައި ދިރިއުޅޭ މީހުންނާއެކު މިނިސްޓްރީން މިހާރު ވެސް ގާތުން މަސައްކަތްކުރަމުން އަންނައިރު, މިނިސްޓްރީއާ އެކު މި މަސައްކަތް ކުރުމަކީ ނިކަމެތި އަދި ނާޒުކު ހާލަތްތަކުގައި ދިރިއުޅޭ މީހުންގެ ހާލަތު ބަދަލުކުރުމަށް ވަރަށް ބޮޑަށް މަގުފަހިވެގެންދާނެ ކަމެއް ކަމަށް އެމްއައިބީން ބުނެފައިވާ ކަމަށް މިނިސްޓްރީން ބުންޏެވެ.