ހުޅުމާލޭގެ ސަލާހުއްދީން ސްކޫލުގައި ކިޔަވާ ދަރިވަރުން ބަލައިދާ ބެލެނިވެރިން މަޑުކޮށްލައިގެން ތިބުމަށް ހާއްސަ "ޝޭޑް ސްޓްރަކްޗާ" އެއް ނުވަތަ ހިޔާވައްސެއް ތަރައްގީކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް އިސްލާމިކް ބޭންކް (އެމްއައިބީ) އާ ދެމެދު މިއަދު އެއްބަސްވުމެއްގައި ސޮއިކޮށްފި އެވެ.

މި މަޝްރޫއު ކުރިއަށް ގެންދިއުމަށްޓަކައި ވެވުނު އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީގެ އެކްޓިން ޑިރެކްޓަރު ހަސަން ޝަހީދު އެވެ. އެމްއައިބީގެ ފަރާތުން ސޮއިކުރެއްވީ އެ ބޭންކުގެ މެނޭޖިން ޑިރެކްޓަރު އަދި ސީއީއޯ މުފައްދަލް އިދްރީސް ކުމާރީ އެވެ.

މި އެއްބަސްވުމުގެ މައިގަނޑު މަގްސަދަކީ ދެ ކުންފުނީގެ އިޖުތިމާއީ ޒިންމާ (ސީއެސްއާރު) ގެ ދަށުން، ސްކޫލް ނިމޭ ގަޑިތަކުގައި ދަރިވަރުން ބަލައިގޮސް ތިބޭ ބެލެނިވެރިންނަށް އަވިންނާއި ވާރޭއިން ސަލާމަތްވެ، ހިޔާލިބޭނެ ފަދަ އިންތިޒާމެއް ހަމަޖައްސައިދިނުމެވެ.

ދެ އަހަރު ދުވަހުގެ މުއްދަތަށް ސޮއިކުރެވުނު މި އެމްއޯޔޫގެ ދަށުން، ޝޭޑް ސްޓްރަކްޗާގެ ކުރެހުމާއި ޑިޒައިން ތައްޔާރުކޮށް ފޯރުކޮށްދޭނީ އެޗްޑީސީގެ ފަރާތުންނެވެ. އަދި އެ ސްޓްރަކްޗާ ގާއިމުކުރުމަށް ބޭނުންވާ ތަކެތި ހޯދުމާއި، އަމަލީ މަސައްކަތް ކުރިއަށް ގެންދާނީ އެމްއައިބީގެ ފަރާތުންނެވެ.

މި މަޝްރޫއުގެ ސަބަބުން ގަދަ އައްވާއި ވިއްސާރައިގައި ސަލާހުއްދީން ސްކޫލް ސަރަހައްދުގައި ކިޔޫ ހަދައިގެން ތިބޭ ބެލެނިވެރިންނަށް ވަރަށް ބޮޑު ލުއިފަސޭހަކަމެއް ލިބިގެންދާނެ ކަމަށް އެޗްޑީސީން ބުނެ އެވެ.

އެޗްޑީސީން އިތުރަށް ހާމަކޮށްފައިވާ ގޮތުގައި، އެ ކުންފުނީގެ އަމާޒަކީ ކުރިއަށް އޮތް ތަނުގައިވެސް މުޖުތަމައަށް ފައިދާހުރި، މިފަދަ ތަފާތު އިޖުތިމާއީ މަޝްރޫއުތައް އެކި ފަރާތްތަކާ ގުޅިގެން ހުޅުމާލޭގައި ކުރިއަށް ގެންދިއުމެވެ.