ރަމަޟާން މަހުގެ ފަހު ދިހައަކީ ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސާފައިވާތީ، އަޅުކަމަށް އިސްކަންދިނުމުގެ މަގުސަދުގައި އެ މުއްދަތުގެ ތެރޭގައި މޯލްޑިވްސް އިސްލާމިކް ބޭންކް (އެމްއައިބީ) އިން ހިދުމަތް ދޭނެ ގަޑިތައް މިއަދު އާންމުކޮށްފިއެވެ.
އެމްއައިބީން ހާމަކުރި ގޮތުގައި، ބޭންކުގެ ބިޒްނަސް ބްރާންޗު ފިޔަވައި އެހެން ހުރިހާ ބްރާންޗުތަކެއް އަންނަ ހޯމަ ދުވަހުން ފެށިގެން އީދު ދުވަހުގެ ނިޔަލަށް ހުޅުވާނީ އެންމެ ދެ ދުވަހުއެވެ. އެއީ މި ހިނގާ މާޗު މަހުގެ 11 ވާ ހޯމަ ދުވަހާއި 18 ވާ ހޯމަ ދުވަހެވެ. މި ނޫން އެހެން ހުރިހާ ދުވަހެއްގައި ބޭންކުގެ އާންމު ބްރާންޗުތައް ބަންދުވާނެއެވެ.
ނަމަވެސް، ވިޔަފާރިވެރިންނަށް ލުއިފަސޭހަކޮށްދިނުމުގެ ގޮތުން ބިޒްނަސް ބްރާންޗުގެ ހިދުމަތްތައް ފޯރުކޮށްދިނުމަށް ވަނީ ހާއްސަ އިންތިޒާމުތަކެއް ހަމަޖައްސާފައެވެ. އެގޮތުން ރަމަޟާން މަހުގެ ފަހު ދިހައިގެ ފުރަތަމަ ދުވަހުން ފެށިގެން ފިތުރު އީދު ދުވަހުގެ ނިޔަލަށް، ބިޒްނަސް ބްރާންޗުން ކަސްޓަމަރުންނަށް ހިދުމަތް ދޭނީ ހެނދުނު 11:30 އިން މެންދުރުފަހު 02:00 އަށެވެ. މި މުއްދަތުގައި މާލޭގައި ހުންނަ ބިޒްނަސް ބްރާންޗުން ޓީޓީ ކުރުމުގެ އެންމެ ފަހު ވަގުތަކީ (ކަޓް-އޯފް ޓައިމް) ހެނދުނު 11:00 އިން މެންދުރު 12:00 އަށެވެ.
އެމްއެމްއޭގެ އިއުލާނާ ގުޅިގެން އެމްއައިބީން އިތުރަށް ބުނީ، ހުރިހާ ބޭންކުތަކެއް ހުޅުވާ ދެ ދުވަސް ކަމަށްވާ މާޗު 11 އަދި 18 ގައި ބިޒްނަސް ބްރާންޗުގެ ހިދުމަތްދޭ ގަޑިތަކަށް ބަދަލު އަންނާނެ ކަމަށެވެ. އެ ދެ ދުވަހު ބިޒްނަސް ބޭންކިންގެ ހިދުމަތް ހެނދުނު 09:30 އިން މެންދުރުފަހު 02:00 އަށް ލިބޭނެއެވެ. އަދި އެ ދެ ދުވަހު ޓީޓީ ކުރުމުގެ އެންމެ ފަހު ވަގުތަކީ ހެނދުނު 09:30 އިން 11:00 އަށެވެ. ހަމައެއާއެކު، އެ ދެ ދުވަހު ކަސްޓަމަރުންނަށް އެހެން ބްރާންޗުތަކުން ހިދުމަތް ދޭނީ ހެނދުނު 09:30 އިން މެންދުރުފަހު 01:30 އަށެވެ.
ރަމަޟާން މަސް ނިމުމަށްފަހު، ޝައްވާލު މަހުގެ ހަ ރޯދައިގެ ދުވަސްތަކުގައިވެސް ހިދުމަތް ދޭނެ ގަޑިތައް ބޭންކުން ވަނީ ކަނޑައަޅާފައެވެ. އެގޮތުން މި މަހުގެ 23 އިން 26 އަށް އެމްއައިބީގެ ބިޒްނަސް ބޭންކިން ހިދުމަތް ފަށާނީ ހެނދުނު 09:30 ގައެވެ.
